আমগুৰি,13 জুন : ক’ৰণা মহামাৰীয়ে বিশেষ ভাৱে প্ৰভাৱ পেলাইছে অসমীয়া শিপিনীসকলক ৷ তাঁতশালতেই পৰি ৰৈছে শিপিনীয়ে হেঁপাহেৰে বোৱা গামোচা-চাদৰ আদি ৷ তাঁতশালত বোৱা গামোচা, চাদৰ-মেখেলা বিক্ৰী কৰিব নোৱাৰি আৰ্থিকভাৱে লোকচানৰ সন্মুখীন হ’ব লগীয়া হৈছে শিপিনীসকল ৷ আমগুৰিৰ দিকচু মাউৎ গাঁৱৰ মহিলাসকলে বৈ উলিওৱা গামোচাই এতিয়া উপযুক্ত বজাৰ লাভ নকৰাত বিক্ৰীৰ বাবে অসুবিধাৰ সন্মুখীন হৈছে ।
দিকচুৰ মাউৎ গাঁৱৰ বিউটি গগৈয়ে অতি সুন্দৰকৈ বৈ উলিয়াইছে পকোৱা সূতাৰ ফুলাম গামোচাকে ধৰি নামঘৰৰ থাপনাত লগা গামোচা, দৰা সাজৰ বাবে গামোচা । ক’ৰণা অতিমাৰীৰ বাবেই উপযুক্ত বজাৰ লাভ নকৰাত সমস্যাৰ সন্মুখীন হৈছে এইসকল মহিলা । এই গাঁওখনৰ প্ৰায়সংখ্যক মহিলাই তাঁতশালত কাপোৰ বৈ বিক্ৰী কৰি জীৱন নিৰ্বাহ কৰি আহিছে যদিও আজিপৰ্যন্ত সংশ্লিষ্ট বিভাগৰ দৃষ্টিগোচৰ হোৱা নাই ।
মহিলাসকলে আজিও ব্যৱহাৰ কৰি আহিছে মাটিশাল । কোনো ধৰণৰ আধুনিক প্ৰযুক্তিৰ তাঁতশাল লাভ কৰা নাই এইসকল মহিলাই । উল্লেখ্য যে, মহিলাসকলে ৰাজ্যৰ হস্ততাত আৰু বস্ত্ৰশিল্প বিভাগৰ সহায় আৰু সহযোগিতা পালে এইক্ষেত্ৰত বহুদূৰ আগবাঢ়ি যাব পাৰিব।
লগতে পঢ়ক:আংশিক লকডাউনে বিপদ নমাইছে ক্ষুদ্ৰ ব্যৱসায়ীৰ জীৱনলৈ
