শিৱসাগৰ, 19 আগষ্টঃ কাঞ্চনজংঘা ছবিৰ প্ৰচাৰৰ বাবে শিৱসাগৰত জনপ্ৰিয় কণ্ঠশিল্পী জুবিন গাৰ্গ ৷ তিনিখন মহাবিদ্যালয়ত উপস্থিত হৈ অনুৰাগীৰ মৰম বুটলিলে শিল্পী গৰাকীয়ে ৷ নৱপ্ৰজন্মৰ হার্টথ্ৰ'ব জুবিন গাৰ্গৰ নৱ নিৰ্মিত অসমীয়া ছবি কাঞ্চনজংঘাৰ প্ৰচাৰৰ মহাবিদ্যালয়সমূহত অব্যাহত ৰাখিছে । কাঞ্চনজংঘা ছবিৰ প্ৰচাৰৰ বাবে কাঞ্চনজংঘাৰ পৰিয়ালে সোমবাৰে শিৱসাগৰত প্ৰচাৰ চলালে তিনিখনকৈ মহাবিদ্যালয়ত ।
আগন্তুক 6 ছেপ্তেম্বৰত মুক্তি লাভ কৰিবলগীয়া কাঞ্চনজংঘা ছবিখনৰ প্ৰচাৰৰ বাবে জুবিন গাৰ্গ উপস্থিত হয় শিৱসাগৰ বাণিজ্য মহাবিদ্যালয়, ছোৱালী মহাবিদ্যালয় আৰু জয়সাগৰ মহাবিদ্যালয়ত । প্ৰচাৰৰ বাবে শিৱসাগৰত উপস্থিত হোৱা শিল্পী জুবিন গাৰ্গ সহ কাঞ্চনজংঘাৰ দলটোৱে অনুস্থানত "কাঞ্চনজংঘা" বোলছবিৰ বিভিন্ন সংলাপ, ছবিখনৰ গীত পৰিৱেশনৰ লগতে বোলছবিখনত অভিনয় কৰা চৰিত্ৰ সমূহকো উপস্থিত ছাত্ৰ-ছাত্ৰী সকলক চিনাকি কৰাই দিয়ে শিল্পী গৰাকীয়ে ৷
