আমগুৰি, 2 জানুৱাৰী: শিৱসাগৰৰ আমগুৰিত ভোগালী বিহুক আদৰিবলৈ ভেলাঘৰ নিৰ্মাণৰ ব্যাপক প্ৰস্তুতি । সমগ্ৰ ৰাজ্যতে 'কা' ৰ প্ৰতিবাদ অব্যাহত থকাৰ মাজতে আমগুৰি হাতীমূৰীয়া পথাৰত ভোগালী বিহুক আদৰিবলৈ ভেলাঘৰ নিৰ্মাণৰ ব্যাপক প্ৰস্তুতি চলিছে ।
অসমীয়াৰ বাপতিসাহোন তিনিটা বিহুৰ অন্যতম ভোগালী বিহুক আদৰিবলৈ হাতীমূৰীয়া গাঁৱৰ ডেকা-জীয়াৰী-বোৱাৰীৰ পৰা আইতালৈকে সকলোৱে আনন্দ কৰা দেখিবলৈ পোৱা গৈছে। ডেকাসকল ভেলাঘৰ বনোৱাত ব্যস্ত হোৱাৰ বিপৰীতে মহিলা সকল আকৌ ব্যস্ত নৰা কটাত । এনে ব্যস্ততাৰ মাজতো কঁকাল ভাঙি নাচিলে আইতা সকলে।
এতিয়া কেৱল অপেক্ষা ভোগালীক আদৰিবলৈ ৷ ভোগালী বিহুৰ বাবে জীয়াৰী-বোৱাৰীসকলে প্ৰস্তুত কৰি উলিয়াইছে চিৰা,পিঠা,সান্দহ,তিলৰ লাৰু,তিল পিঠা,সুতুলী পিঠাকে ধৰি মহৰ দৈ ইত্যাদি। লগতে পৰম্পৰাগত নিয়ম অনুসৰি হাতীমূৰীয়া গাঁওৰ অধিকাংশ পৰিয়ালেই প্ৰস্তুত কৰি উলিয়াইছে সাঁজপানী ৷ এতিয়া এনেদৰেই আমগুৰীত ভোগালীক আদৰিবলৈ চলিছে ব্যাপক প্ৰস্তুতি।
