সোণালী সূতাৰে আত্মনিৰ্ভৰশীল হোৱাৰ প্ৰচেষ্টাত প্ৰাক্তন আলফানেতা

আত্মসমৰ্পণৰ পিচত তীব্ৰ আৰ্থিক সংকটত ভোগা প্ৰাক্তন আলফা দম্পতীয়ে , লাহ-বিলাসিতাৰ জীৱন ত্যাগ কৰি খেতি-বাতিৰ লগতে মুগা পালনেৰে জীৱিকা নিৰ্বাহ কৰিছে ৷ আনকি নিজ সন্তানক উচ্চ শিক্ষিত কৰাৰো সপোন পুহি ৰাখিছে প্ৰাক্তন আলফা নেতাগৰাকীয়ে ৷

শিৱসাগৰ,13 মে’: এসময়ত স্বাধীন অসম গঢ়াৰ সপোনেৰে বিপ্লৱৰ পথত খোজ দিয়া আলফানেতা জান ডেকাবৰুৱা বৰ্তমান ব্যস্ত হৈ পৰিছে সোণোৱালী সূতাৰে জীৱন গঢ়াত...ডিমৌ নৈৰ বাঢ়নী পানীৰ মাজতো মুগা পলুক জীয়াই ৰখাৰ চেষ্টা অব্যাহত ৰাখিছে আত্মসমৰ্পণকাৰী আলফা দম্পতি জান ডেকাবৰুৱা আৰু তেঁওৰ সহধৰ্মিনী অসমী দিহিঙীয়াই ৷ মৰাণৰ নাহৰণি গাঁৱৰ খোৱাং মিচিমি জানত মুগা পালন কৰি থকাৰ অৱস্থাতে দেশ তথা জাতিৰ স্বাৰ্থত ১৯৮৭ চনত আলফাত যোগদান কৰে জান ডেকাবৰুৱাই ।

আত্মসমৰ্পণৰ পিচত তীব্ৰ আৰ্থিক সংকটত ভোগা প্ৰাক্তন আলফা দম্পতীয়ে ,লাহ-বিলাসিতাৰ জীৱন ত্যাগ কৰি খেতি-বাটিৰ লগতে মুগা পালনেৰে জীৱিকা নিৰ্বাহ কৰিছে ৷ বৰ্তমান সময়ত মিচিমি জানত সুকীয়া সুকীয়াকৈ প্ৰায় ১১ জন ব্যক্তিয়ে মুগা পালন কৰি আছে । উল্লেখ্য যে, এই সকল আদৰ্শবান মুগাপালকক চৰকাৰে কিছু সহায় কৰিলে তেওঁলোকে মুগা পালন কৰি এজন সক্ৰিয় মুগা পালক হিচাপে পৰিচয় দিবলৈ সক্ষম হ’ব ৷