শিৱসাগৰ, 23 অক্টোবৰঃ পোহৰৰ উৎসৱ দীপাৱলীলৈ মাজত মাত্ৰ কেইটামান দিন বাকী ৷ দীপাৱলীক আদৰিবলৈ এতিয়া সাজু ৰাজ্যবাসী ৷ দীপাৱলীৰ বাবে মৃৎ শিল্পী সকলৰ মাজত বাঢ়িছে ব্যাপক ব্যস্ততা ৷ ৰং বিৰঙী বৈদ্যুতিক লাইটৰ আগ্ৰাসনে থলুৱা শিল্পীসকলৰ প্ৰতি প্ৰত্যাহ্বানৰ সৃষ্টি কৰিলেও শ বছৰীয়া শিল্পটোক জীয়াই ৰখাৰ ক্ষেত্ৰত কোনো ক্ৰুটি ৰখা নাই শিৱসাগৰৰ নামদাং কুমাৰ গাঁৱৰ মৃৎ শিল্পী সকলে ৷ বিগত পাঁচ দশক ধৰি মাটিৰ চাকি আৰু মাটিৰ অন্যান্য সামগ্ৰী প্ৰস্তুত কৰি জীৱন জীৱিকাৰ বাট মোকলাই আহিছে গাঁও খনৰ কেইটামান পৰিয়ালে ৷ দিখৌৰ পৰা আলতীয়া মাটি সংগ্ৰহ কৰি অশেষ পৰিশ্ৰমৰ অন্তত পৰিয়ালকেইটাই সাজি উলিয়াই মাটিৰ চাকি ৷
উল্লেখ্য যে,পূৰ্বে অঞ্চলটোৰ বহু সংখ্যক লোকে এই বৃত্তিৰ সৈতে জড়িত আছিল যদিও বৰ্তমানে মাত্ৰ ছয়টা মান পৰিয়ালেহে এই বৃত্তিৰ লগত জড়িত হৈ আছে ৷ কিয়নো শ্ৰম অনুসৰি পৰ্যাপ্ত উপাৰ্জন নোপোৱা বাবেই পৰম্পৰাগত বৃত্তিটো ত্যাগ কৰিবলৈ বাধ্য হৈছে পৰিয়ালকেইটাই ৷ অন্য বৃত্তিৰ তুলনাত কম লাভজনক এই থলুৱা শিল্প তথা বৃত্তিটোক জীয়াই ৰখাৰ বাবে চৰকাৰী সাহায্যৰ লগতে আন্তঃগাঁথনি আৰু উপযুক্ত বজাৰ সৃষ্টিটো অতি প্ৰয়োজন হৈ পৰিছে ৷ অন্যথা ক্ৰমান্বয়ে লোপ পাবলৈ ধৰা পৰম্পৰাগত শিল্পটো আৰু কেইবছৰ মানৰ পাচতে যে চিৰদিনৰ বাবে অতীত হ'ব সেয়া নিশ্চিত ৷
