শিৱসাগৰ,10 জানুৱাৰীঃ মহানগৰীত শুকুৰবাৰৰ পৰা আৰম্ভ হৈছে তৃতীয় সংখ্যক মেগা ইভেণ্ট খেলো ইণ্ডিয়া য়ুথ গেমছ ৷ ৰাষ্ট্ৰীয় পৰ্য্যায়ৰ ক্ৰীড়ানুষ্ঠানটোত অংশগ্ৰহণৰ বাবে ইতিমধ্যে উপস্থিত হৈছে দেশৰ ভিন্ন প্ৰান্তৰ খেলুৱৈসকল ৷ আড়ম্বৰপূৰ্ণ খেলো ইণ্ডিয়াৰ উদ্বোধনী অনুষ্ঠানত অংশ লয় বিভিন্ন ক্ষেত্ৰৰ জৰিয়তে সমাজলৈ অৱদান আগবঢ়োৱা ব্যক্তিসকলে ৷ লগতে উপস্থিত থাকে ভিন্ন ৰাজনৈতিক দলৰ নেতাসকল ৷
কিন্তু উদ্বোধনী অনুষ্ঠানৰ কাৰ্যসূচীৰ বাবে উপেক্ষিত হৈ ৰয় ৰাজ্যৰ প্ৰথমগৰাকী অৰ্জুন বঁটা বিজয়ী ভোগেশ্বৰ বৰুৱা ৷ চৰকাৰী পৃষ্ঠপোষকতাত আয়োজন কৰা ক্ৰীড়ানুষ্ঠানটোত ৰাজ্য চৰকাৰৰ আমন্ত্ৰণ কৰিবলৈ আহৰি নহ’ল প্ৰবীণ খেলুৱৈ গৰাকীক ৷ ক্ৰীড়া অনুষ্ঠানটো আৰম্ভৰ পূৰ্বে চৰকাৰে খেলুৱৈ গৰাকীৰ সৈতে ফোনযোগে যোগাযোগ কৰে যদিও পৰৱৰ্তী সময়ত নিমন্ত্ৰণ নকৰাত ক্ষোভ প্ৰকাশ কৰে ভোগেশ্বৰ বৰুৱাই ৷
উল্লেখ্য যে, ১৯৬৬ ৰ বেংকক এছিয়ান গেমছৰ ৮০০ মিটাৰ দৌৰত স্বৰ্ণপদক আঁজুৰি আনিবলৈ সক্ষম হোৱা বৰ্ষীয়ান খেলুৱৈগৰাকীৰ প্ৰতি চৰকাৰে সন্মান প্ৰদৰ্শন নকৰাত দুখ প্ৰকাশ কৰে খেলুৱৈগৰাকীয়ে ৷ দিনকদিনে ক্ৰীড়াক্ষেত্ৰত ৰাজনীতিৰ প্ৰভাৱ বৃদ্ধি পোৱা বাবেই প্ৰকৃত খেলুৱৈৰ আদৰ নাইকিয়া হোৱা বুলি প্ৰকাশ কৰিছে ১৯৬৭ চনত অৰ্জুন পুৰস্কাৰ লাভ কৰা ক্ৰীড়াবিদ গৰাকীয়ে ৷
লগতে চাওকঃদলগাঁৱৰ এখন বিদ্যালয়ে এদল ছাত্ৰীক দেখুৱাইছে নতুন সপোন
