আমগুৰি,28 ফেব্ৰুৱাৰী: আমগুৰিৰ এটা পথ নিৰ্মাণত ঠিকাদাৰে মইমতালি কৰাৰ গুৰুতৰ অভিযোগ উত্থাপিত হৈছে ৷ স্থানীয় ৰাইজৰ অভিযোগ অনুসৰি তিনিটা বছৰ পূৰ্বে আধাৰশিলা স্থাপন হোৱা এটি পথ ঠিকাদাৰৰ হেমাহিৰ বাবে আজিকোপতি সম্পূৰ্ণ হৈ নুঠিল ৷ যাৰ পৰিপ্ৰেক্ষিতত যাতায়াতৰ ক্ষেত্ৰত হাৰাশাস্তিৰ সন্মুখীন হৈছে আমগুৰিৰ লোকসকল ৷
ৰাইজে জানিবলৈ দিয়া মতে,স্থানীয় বিধায়ক গৰাকীক কেইবাবাৰো এই বিষয়ে অৱগত কৰা হৈছিল ৷ কিন্তু ঠিকাদাৰে বিধায়ক গৰাকীৰ নিৰ্দেশকো কেৰেপ নকৰি নিজ ইচ্ছাৰে অতি লেহেমীয়া গতিত আৰু নিম্ন মানৰ সামগ্ৰী ব্যৱহাৰ কৰি পথ নিৰ্মাণৰ কাম আগবঢ়াই লৈ গৈছিল ৷
উল্লেখ্য যে, 2018 চনৰ অক্টোবৰত বিধায়ক প্ৰদীপ হাজৰিকাই বৰশয়ক-ডিব্ৰুৱাল সংযোগী পথটোৰ আধাৰশিলা স্থাপন কৰিছিল ৷ প্ৰায় 8 কিল’মিটাৰ দৈৰ্ঘৰ পথটোৰ নিৰ্মাণৰ বাবে এচঅ’পিডি আঁচনিৰ যোগেদি 2 কোটিৰো অধিক পুঁজি আৱণ্টিত হৈছিল ৷ 500 ৰো অধিক পৰিয়াল থকা গাঁৱখনৰ একমাত্ৰ পথটো স্বাধীনতাৰ পৰৱৰ্তী পৰ্যায়ত পোন প্ৰথমবাৰৰ বাবে পকীকৰণ হোৱাৰ পথত আগবাঢ়িছিল, যদিও ঠিকাদাৰৰ মইমতালিৰ বাবে সম্পূৰ্ণ হোৱা নাই পথটোৰ নিৰ্মাণৰ কাম ৷ যাৰ বাবে স্থানীয় ৰাইজ ক্ষোভিত হৈ পৰা পৰিলক্ষিত হৈছে ৷
