আমগুৰি, 23 ডিচেম্বৰ : ৰাজ্যৰ অধিকাংশ চৰকাৰী বিভাগৰ বিৰুদ্ধে দুৰ্নীতিৰ অভিযোগ ৷ চৰকাৰে জন সাধাৰণৰ কল্যাণৰ হকে বিভিন্ন সময়ত অভিলাসী আঁচনি গ্ৰহণ কৰে ৷ কিন্তু এই আঁচনিসমূহৰ সুবিধা প্ৰকৃত হিতাধিকাৰীয়ে বহু সময়তে লাভ নকৰে বুলি অভিযোগ উত্থাপিত হয় ৷ তেনে এক ঘটনাই সংঘটিত হৈছে শিৱসাগৰ জিলাত ৷ জিলাখনত থকা নীৰ নিৰ্মল যোজনা আঁচনি (Neer Nirmal Yojana Scheme) সম্প্ৰতি একপ্ৰকাৰ প্ৰহসনত পৰিণত হৈছে (Corruption in Neer Nirmal Yojana Scheme) ৷
জানিব পৰা মতে, ৰাজ্যৰ জনস্বাস্থ্য কাৰিকৰী বিভাগৰ অধীনতে আছে এইখন আঁচনি ৷ এই আঁচনিৰ অধীনত কৰ্মৰত স্বেচ্ছাসেৱক সকলে সম্প্ৰতি দিন পাৰ কৰিছে আৰ্থিক দুৰৱস্থাৰ মাজেৰে ৷ বৰ্তমানলৈকে জিলাখনত প্ৰায় 50 গৰাকী লোকে বিনা বেতনে দায়িত্বত নিয়োজিত হৈ আছে ৷ দীৰ্ঘদিনে বিনা বেতনে কাম কৰাৰ ফলতে এইসকল লোকে ভূগিছে আৰ্থিক সংকটত ৷ বিগত 2013 চনত ৰাইজক বিশুদ্ধ খোৱাপানী যোগানৰ অৰ্থে কেন্দ্ৰীয় চৰকাৰে জনস্বাস্থ্য কাৰিকৰী বিভাগৰ জৰিয়তে আৰম্ভ কৰিছিল নীৰ নিৰ্মল যোজনা নামৰ আঁচনিখন ৷ চৰকাৰে আঁচনি মুকলি কৰিছিল ঠিকেই, কিন্তু লাভান্বিতহে নহ’ল হিতাধিকাৰীসকল ৷
উল্লেখ্য যে, শিৱসাগৰ জিলাৰ আমগুৰি আৰু গৌৰীসাগৰ উন্নয়ন খণ্ডৰ 25 খন পঞ্চায়তত জৰীপ কৰিবৰ বাবে প্ৰতিখন গাঁও পঞ্চায়তত দুজনকৈ লোকক নিযুক্তি প্ৰদান কৰা হৈছিল ৷ তদুপৰি প্ৰতিঘৰ হিতাধিকাৰীৰ পৰা 450 টকাকৈ আৰু অনুসূচিত জাতি-জনজাতিৰ লোকসকলৰ পৰা 225 টকাকৈ মুঠ 30 লাখ টকা সংগ্ৰহ কৰা বুলি বৰ্তমান অভিযোগ উত্থাপন হৈছে ৷ যাৰ বাবে ধন সংগ্ৰহ আৰু জৰীপৰ বাবে জনস্বাস্থ্য কাৰিকৰী বিভাগে অনিয়মীয়াকৈ নিযুক্তি দিয়া স্বেচ্ছাসেৱক সকলে বিনা বেতনে কাম কৰি থকাৰ উপৰিও ৰাইজৰ প্ৰশ্নৰ সন্মুখীন হৈছে ৷
এই খাম-খেয়ালি অব্যাহত থকাৰ মাজতে শেহতীয়াকৈ ৰাজ্যৰ জনস্বাস্থ্য কাৰিকৰী বিভাগৰ মন্ত্ৰী ৰণজিৎ দাসে বিভাগটোৰ প্ৰায় 22 হাজাৰ খালী পদ পূৰণৰ কথা ঘোষণা কৰিছিল ৷ মন্ত্ৰীগৰাকীৰ এই ঘোষণাৰ পিছতে ক্ষুব্ধ হৈ পৰিছে অস্থায়ী বিনা বেতনে দীৰ্ঘদিনে কাম কৰি থকা কৰ্মচাৰীসকল ৷ বিগত 2016 চনৰ পৰা বিনা বেতনে কাম কৰি থকা কৰ্মচাৰীসকলে এইক্ষেত্ৰত প্ৰথমে প্ৰাধান্য পোৱাৰ দাবী উত্থাপন কৰিছে ৷
