নলবাৰী, 10 এপ্ৰিল : নলবাৰীত চাঞ্চল্যকৰ ঘটনা ৷ নলবাৰী চহৰৰ বৰীগাঁৱৰ এগৰাকী কিশোৰৰ আত্মহত্যাৰ ঘটনাই অঞ্চলজুৰি চাঞ্চল্যৰ সৃষ্টি কৰা পৰিলক্ষিত হৈছে ৷ কিশোৰগৰাকীয়ে আত্মহত্যাৰ দৰে ভয়ংকৰ সিদ্ধান্ত লোৱা ঘটনাই সমগ্ৰ অঞ্চলটোতে ব্যাপক প্ৰতিক্ৰিয়াৰ সৃষ্টি কৰিছে (Suicide case in Nalbari) ।
আত্মহত্যা কৰা কিশোৰজন নলবাৰীৰ বৰীগাঁৱৰ সেনা বাহিনীৰ প্ৰাক্তন জোৱানৰ পুত্ৰ বুলি জানিবলৈ পৰা গৈছে ৷ দেওবাৰৰ নিশাৰ ভাগত বৰীগাঁৱৰ ভাৰাঘৰত আত্মহত্যাৰ দৰে চূড়ান্ত সিদ্ধান্ত গ্ৰহণ কৰিছে নৱম মান শ্ৰেণীত অধ্যয়নৰত ছাত্ৰজনে । নলবাৰীৰ বৰীগাঁৱৰ বাসিন্দা অনিল বৰ্মন নামৰ সেনা বাহিনীৰ প্ৰাক্তন জোৱানজনে পৰিয়াল সহিতে নলবাৰী চহৰৰ কাজিপাৰাত ভাৰাতীয়া হিচাবে বাস কৰি আছিল (Teenage boy suicide in Nalbari)।
দেওবাৰৰ বিয়লিৰ ভাগত জ্যেষ্ঠ পুত্ৰক ভাৰাঘৰত থৈ সেনা বাহিনীৰ প্ৰাক্তন জোৱানজন পত্নীৰে সৈতে গৈছিল নিজ গৃহ গাঁওলৈ । গাঁৱৰ পৰা উভতি আহি ১৫ বছৰীয়া বৰপুত্ৰক এক ভয়ংকৰ ৰূপত দেখি হতবাক হৈ পৰে পৰিয়ালটো । ভাৰাঘৰৰ ভিতৰৰ পৰা দৰ্জা বন্ধ কৰি নৱম শ্ৰেণীৰ ছাত্ৰগৰাকীয়ে চিপ লৈ থকা অৱস্থাত প্ৰত্যক্ষ কৰে পিতৃ-মাতৃয়ে । চিলিং ফেনত ওলমি থকা অৱস্থাত নিজৰ পুত্ৰক উদ্ধাৰ কৰাৰ লগতে একেটা কোঠাতে এটা ফেনাইলৰ বটলো প্ৰত্যক্ষ কৰে পৰিয়াল তথা স্থানীয় লোকে । এই দৃশ্যই ঘটনাটোক অধিক ৰহস্যৰ মাজলৈ ঠেলি নিয়া পৰিলক্ষিত হৈছে (Mysterious suicide incident in Nalbari) ৷
অমায়িক স্বভাৱৰ কিশোৰজন নলবাৰীৰ শংকৰদেৱ বিদ্যা নিকেতনত নৱম মান শ্ৰেণীত পঢ়ি আছিল বুলি স্থানীয় লোকে জানিবলৈ দিয়ে ৷ পিচত নলবাৰী সদৰ আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰাৰ লগতে সমগ্ৰ ঘটনাটোৰ তদন্ত আৰম্ভ কৰিছে । এগৰাকী নৱম শ্ৰেণীত অধ্যয়নৰত কিশোৰ ছাত্ৰই কিহৰ হেঁচাত আত্মহত্যাৰ দৰে চূড়ান্ত সিদ্ধান্ত গ্ৰহণ কৰিলে সেয়া এতিয়াও পোহৰলৈ অহা নাই (Nalbari police station) ।
লগতে পঢ়ক : Protest against Drugs: ড্ৰাগছৰ বিৰুদ্ধে তিনিচুকীয়াত গাঁওবাসীৰ প্ৰতিবাদ
