নলবাৰী,31 জুলাইঃ নেৰা-নেপেৰা বৰষুণ আৰু ভূটানে এৰি দিয়া বান্ধৰ পানীৰ ফলত পাগলাদিয়া নৈ ৰ জলপৃষ্ঠ বৃদ্ধিয়ে প্ৰলয়ংকাৰী বানৰ সৃষ্টি কৰিছে নলবাৰী-বাক্সা জিলাৰ সীমান্তৱৰ্তী গাঁও সমূহত ৷ ইতিমধ্যে,বানত বুৰ গৈছে বাগানপাৰা ৰাজহ চক্ৰৰ অন্তৰ্গত সুন্দৰপুৰ, জাৰতালুক, গোৱালবিলকে ধৰি প্ৰায় পোন্ধৰ খন গাঁও ৷ যোৱা এমাহ ধৰি কেইবাটাও বানৰ ফলত ক্ষতিগ্ৰস্ত হৈছে গাঁওখনৰ কেইবাটাও পৰিয়াল ৷ নষ্ট হৈছে সেউজীয়া খেতি পথাৰ, ধ্বংস হৈছে কেইবাটাও বাসগৃহ ৷
অসহায় বানাক্ৰান্তৰ নৈ পূজন
কোনো কালে নেদেখা এই ভয়ংকৰ বানপানীৰ পৰা ৰক্ষা পোৱাৰ নিমিত্ৰে পাগলাদিয়া নৈৰ বুকুত নৈবেদ্য আগবঢ়াই গাঁৱৰ সাধাৰণ ৰাইজে ৷ নৈৰ পাৰত নাম-কীৰ্ত্তন কৰি বানপানীৰ পৰা পৰিত্ৰাণ বিচাৰে জাৰতালুক আৰু সুন্দৰপুৰ গাঁৱৰ মহিলা সকলে ৷ বান নিয়ন্ত্ৰণ বিভাগ অথবা চৰকাৰ নহয় ভগৱানেই যেন শেষ ভৰসা হৈ পৰিছে এতিয়া অঞ্চলবাসীৰ বাবে ৷
