নলবাৰী,19 ছেপ্টেম্বৰ : এখন বিদ্যালয়ক লৈ নলবাৰীৰ কুৰিহামাৰী চৰত দুই ফৈদৰ মাজত টনা আঁজোৰা । বিদ্যালয় স্থানান্তৰিত কৰাক লৈ সৃষ্টি হৈছে সংঘাত ৷ জানিব পৰা মতে, বৰক্ষেত্ৰী প্ৰাথমিক শিক্ষা খণ্ডৰ অধীনস্থ কুৰিহামাৰী চৰত থকা মন্টুৰ চুপা প্ৰাথমিক বিদ্যালয়খন গৰাখহনীয়াৰ কবলত পৰাৰ বাবে প্ৰায় দুমাহ পূৰ্বে বিদ্যালয়খন ৩ নং বৰবালা চৰলৈ স্থানান্তৰ কৰা হৈছিল । যাৰ বাবে বিদ্যালয়খন স্থানান্তৰিত কৰাক লৈ বৰ্তমান দুই ফৈদৰ মাজত সৃষ্টি হৈছে সংঘাত ৷
স্থানীয় ৰাইজৰ অভিযোগ মতে, একাংশ লোকে এতিয়া বিদ্যালয়খন পুনৰ অন্য এটা স্থানলৈ স্থানান্তৰিত কৰাৰ যো-যা চলাইছে । উল্লেখযোগ্য যে বিদ্যালয়খন পূৰ্বতে থকা স্থানৰ অধিকাংশ লোকে গৰাখহনীয়াৰ কবলত পৰি এতিয়া ৩ নং বৰবালা চৰত বসবাস কৰি আছে । আনহাতে ৩ নং বৰবালা চৰৰ পৰা প্ৰায় চাৰি কিলোমিটাৰ দূৰত্বলৈকে এখনো চৰকাৰী বিদ্যালয় নাই । সেয়েহে গৰাখহনীয়াৰ কবলত পৰা বিদ্যালয়খনৰ পৰিচালনা সমিতিৰ সিদ্ধান্ত মৰ্মে প্ৰায় দুমাহ পূৰ্বে বিদ্যালয়খন ৩ নং বৰবালা চৰত পুনৰ সংস্থাপন কৰিছিল । বৰ্তমান বিদ্যালয়খনত 7 খন গাঁৱৰ শতাধিক ছাত্র-ছাত্ৰীয়ে পাঠ গ্ৰহণ কৰি আছে ।
