নলবাৰী, 11 আগষ্ট : প্ৰধানমন্ত্ৰী নৰেন্দ্ৰ মোডীয়ে ভাৰতবৰ্ষক ডিজিটেল ভাৰতবৰ্ষ গঢ়ি তোলাৰ ক্ষেত্ৰত প্ৰচেষ্টা অব্যাহত ৰাখিছে ৷ দেশৰ সকলো শিক্ষানুষ্ঠান, ৰাষ্টা-ঘাট উন্নত কৰাৰ বাবে বিভিন্ন সময়ত আঁচনি ৰূপায়ন কৰা পৰিলক্ষিত হৈছে ৷ আনকি, প্ৰতিখন গাঁৱত বিদ্যুৎ যোগান, বিশুদ্ধ খোৱা পানী যোগান ধৰাৰ ব্যবস্থা কৰিছে ৷
কিন্তু প্ৰধানমন্ত্ৰী নৰেন্দ্ৰ মোডীৰ ডিজিটেল আঁচনিক ঢুকি পোৱা নাই অসমৰ এখন জিলাই ৷ নলবাৰী জিলাৰ এটা জৰাজীৰ্ণ পথে প্ৰকৃতাৰ্থত দাঙি ধৰিছে ডিজিটেল ভাৰতবৰ্ষৰ ফোঁপোলা স্বৰূপক ৷
তথ্য অনুসৰি, জিলাখনৰ বৰক্ষেত্ৰী সমষ্টিৰ বিধায়ক নাৰায়ণ ডেকাৰ সমষ্টিৰ বেছকুছিৰ পৰা জালকাটা বিললৈ যোৱা পথটোৱে বিগত বহু বছৰৰ পৰাই অঞ্চলবাসীক জীয়াতু ভুগাই আহিছে ৷ কিন্তু মৰণফান্দ সদৃশ পথটো মেৰামতিৰ নামত আজিলৈ নপৰিল এচপৰা মাটি ৷ পৰিতাপৰ বিষয় যে, পৰিবৰ্তনৰ লক্ষ্যৰে দিছপুৰৰ গাদী দখল কৰা চৰকাৰখনে নিৰ্বাচনৰ আগত পথটো মেৰামতি কৰাৰ প্ৰতিশ্ৰুতি প্ৰদান কৰিছিল কিন্তু নিৰ্বাচনৰ পিচত ৰাইজৰ সমস্যা সমাধান নকৰাৰ অভিযোগ ৰাইজৰ ৷
লগতে পঢ়ক : বিধায়ক বিহীন সমষ্টিত ঠিকাদাৰৰ ব্যাপক অনিয়ম
