নলবাৰী, ৬ অক্টোবৰ: যোৱা ৩ অক্টোবৰত নলবাৰী জিলাৰ তন্ত্ৰশংকৰা গাঁৱৰ ঈশানী কাশ্যপ নামৰ এটি নিশা ঘৰৰ পৰা বাহিৰলৈ ওলাই যাওঁতেই এডাল বিষাক্ত সাপে ঈশানীৰ ভৰিত মেৰিয়াই দংশন কৰে ৷ লগে লগে ঈশানীৰ চিঞৰ শুনি পিতৃয়ে সাপডাল ভৰিৰ পৰা এৰুৱাই দিয়ে যদিও ইতিমধ্যে বিষাক্ত সাপডালে দংশন কৰিছিল কণমানি ছাত্ৰীগৰাকীক ৷ ততাতৈয়াকৈ কণমানি ঈশানী কাশ্যাপক নলবাৰী চিকিৎসা মহাবিদ্যালয় চিকিৎসালয়ত ভৰ্তি কৰোৱা হৈছিল যদিও উপযুক্ত চিকিৎসাৰ অভাৱত শিশুটিৰ মৃত্য়ু হোৱা বুলি পৰিয়ালৰ লোকে গুৰুতৰ অভিযোগ উত্থাপন কৰাত ইয়াকে লৈ প্ৰতিক্ৰিয়াৰ সৃষ্টি হয় । এই সন্দৰ্ভত শুক্ৰবাৰে প্ৰতিক্ৰিয়া প্ৰকাশ কৰিছে নলবাৰী চিকিৎসা মহাবিদ্যালয় চিকিৎসালয়ৰ অধীক্ষক ডাঃ মাধৱ ৰাজবংশীয়ে ।
কালি নলবাৰী চিকিৎসা মহাবিদ্যালয় চিকিৎসালয়খনত এন্টিভেনাম নথকাৰ অভিযোগ উত্থাপন কৰে শিশুটিৰ পৰিয়ালৰ লোকে । শিশুটিৰ পৰিয়ালৰ লোকে ঈশানীক এন্টিভেনাম নিদিয়াৰ গুৰুতৰ অভিযোগ উত্থাপিত হয় । কেৱল ইমানেই নহয়, নলবাৰী চিকিৎসা মহাবিদ্যালয় চিকিৎসালয়খনত স্বাস্থ্য সেৱাৰ নামত কেৱল মাথো অট্টালিকাবোৰ নিৰ্মাণ কৰি থোৱাৰ বাদে আন কোনো সু-চিকিৎসা নোপোৱাৰ অভিযোগ উত্থাপন কৰিছে ভুক্তভোগী পৰিয়ালে । আজি সংবাদ মাধ্যমৰ আগত নলবাৰী চিকিৎসা মহাবিদ্যালয় চিকিৎসালয়খনৰ অধীক্ষক ডাঃ মাধৱ ৰাজবংশীয়ে এনে অভিযোগ অস্বীকাৰ কৰি এন্টিভেনাম থকা বুলি সদৰী কৰে । তেওঁ কয় যে চিকিৎসালয়খনত এন্টিভেনাম মজুত আছে ।
