যৌতুকৰ বাবেই অগ্নিসংযোগ কৰি হত্যাৰ চেষ্টা বোৱাৰীক

নলবাৰীত যৌতুকৰ বাবে গাত কেৰাচিন ঢালি জ্বলাই দিয়াৰ অপচেষ্টা বোৱাৰীক

নলবাৰী,5 আগষ্টঃ পুনৰ যৌতুকৰ বাবে সংঘটিত হৈছে সভ্য সমাজক লজ্জানত কৰা ঘটনা ৷ নলবাৰীৰ সুৰাদি-মেলপাৰাত সংঘটিত হৈছে এই ঘটনা ৷ দুই সন্তানৰ মাতৃৰ গাত কেৰাচিন তেল ঢালি জ্বলাই দিয়াৰ অপচেষ্টাৰ অভিযোগ ৷ স্বামী,দেওৰ আৰু ননদে মিলি হত্যাৰ চেষ্টা কৰাৰ অভিযোগ চানোৱাৰা বিবি নামৰ মহিলাগৰাকীৰ ৷ নলবাৰীৰ সুৰাদি-মেলপাৰাৰ আমিন আলী আৰু একে গাওঁৰে চানোৱাৰা বিবি নামৰ এইগৰাকী মহিলাৰ ৭ বছৰ পূৰ্বে বিয়া হৈছিল ৷ অভিযোগ অনুসৰি, দুটা সন্তান জন্মৰ পিছতো স্বামীগৃহই যৌতুক বিচাৰি চানোৱাৰা বিবিৰ ওপৰত চলাইছিল শাৰীৰিক আৰু মানসিক নিৰ্যাতন ৷

অৱশেষত নিৰ্যাতনৰ সীমা চেৰাই দেওবাৰে নিশা চানোৱাৰাৰ গাত স্বামী আমিন আলী,দেওৰ আজিদ আলী আৰু ননদ ৰঞ্জু বিবিয়ে গাত জুই জ্বলাই হত্যা কৰাৰ অপচেষ্টা চলোৱাৰ অভিযোগ চানোৱাৰাৰ ৷ স্বামী,দেওৰ আৰু ননদৰ অকথ্য নিৰ্যাতনৰ মাজতে চেগ বুজি চানোৱাৰাই দুই সন্তানক লৈ পলাবলৈ চেষ্টা কৰিছিল যদিও দেওৰ আজিদে কনমানি পুত্ৰ সন্তানটোক আজুৰি লৈ যায় চানোৱাৰাৰ কোলাৰ পৰা ৷ উপায়হীন হৈ কন্যাক লগত লৈয়ে জীৱন বচাবলৈ স্বামীগৃহৰ পৰা পলায়ন কৰে চানোৱাৰাই ৷ সেই অৱস্থাতে চানোৱাৰাই বাহিৰে বাহিৰে নিশাই নলবাৰী সদৰ থানাত উপস্থিত হৈ লম্পট স্বামী,দেওৰ আৰু ননদৰ বিৰুদ্ধে এজাহাৰ দাখিল কৰে ৷ ইতিমধ্যে এজাহাৰৰ ভিত্তিত নলবাৰী আৰক্ষীয়ে তদন্ত আৰম্ভ কৰিছে যদিও বৰ্তমানলৈকে কোনো অভিযুক্তকে আটক কৰিব পৰা নাই আৰক্ষীয়ে ৷