নলবাৰী, 16 নৱেম্বৰ: ৰাষ্ট্ৰীয় পৰ্যায়ৰ ক্ৰীড়া ক্ষেত্ৰত গুৰু দায়িত্ব লাভ কৰা ৰাজ্যৰ দুগৰাকী বিশিষ্ট ক্ৰীড়া সংগঠকক ৰাজহুৱাভাৱে অভিনন্দন ৷ দেওবাৰে নলবাৰীত ৰাজ্যৰ দুগৰাকী বিশিষ্ট ক্ৰীড়া সংগঠক লক্ষ্য কোঁৱৰ আৰু অমল নাৰায়ণ পাটোৱাৰীক ৰাজহুৱাভাৱে অভিনন্দন জ্ঞাপন কৰা হয় ৷
নলবাৰী ক্ৰীড়া সন্থাৰ উদ্যোগত আৰু নলবাৰী জিলা কাবাডী হেণ্ডবল সন্থাৰ সহযোগত নলবাৰী ক্ৰীড়া ভৱনত ভাৰতীয় এথলেটিক সন্থাৰ উপ-সভাপতি হিচাপে নিৰ্বাচিত অসম এথলেটিক সন্থাৰ সভাপতি লক্ষ্য কোঁৱৰ আৰু ভাৰতীয় হেণ্ডবল সন্থাৰ উপ-সভাপতি হিচাপে নিৰ্বাচিত হোৱা অসম হেণ্ডবল সন্থাৰ সভাপতি অমল নাৰায়ণ পাটোৱাৰীক নলবাৰীত অভিনন্দন জনোৱা হয় ৷
এই অভিনন্দন অনুষ্ঠানত নলবাৰী ক্ৰীড়া সন্থাৰ উপৰিও নলবাৰী জিলা কুংফু সন্থা , জিলা ক্ৰিকেট সন্থা, জিলা কেৰম সন্থা, জিলা এথলেটিক সন্থাকে ধৰি ভালেসংখ্যক ক্ৰীড়া সংগঠন আৰু ক্লাবে দুই বিশিষ্ট ক্ৰীড়া সংগঠকক অভিনন্দন জনায় ৷ অনুষ্ঠানত নলবাৰী ক্ৰীড়া সন্থাৰ উপ-সভাপতি নগেন ডেকা, জ্যেষ্ঠ ক্ৰীড়া সংগঠক হৰিশ গোস্বামী, আব্দুল ৰৌফ, ডাঃ কৈলাস ডেকা, হেমেন্দ্ৰ মহন্ত, ভাৰপ্ৰাপ্ত জিলা ক্ৰীড়া বিষয়া বিষ্ণুজ্যোতি কলিতাকে ধৰি বহুকেইগৰাকী ক্ৰীড়া সংগঠক উপস্থিত থাকে ৷
লগতে পঢ়ক:বিটিচি নিৰ্বাচনত বিজেপি জয়ী হ'লেই জেললৈ যাব হাগ্ৰামা
