বৃদ্ধাশ্ৰমৰ পৰা পুত্ৰই ঘৰলৈ নিলে বৃদ্ধ পিতৃক

নিজ পুত্ৰ-কন্যা আৰু বোৱাৰীৰ দ্বাৰা অৱহেলাৰ বলি হোৱা এগৰাকী বৃদ্ধৰ কৰুণ কাহিনী ৷ বৃদ্ধ গৰাকীয়ে আপোন ঘৰখনৰ পৰা ওলাই আহি শেষ আশ্ৰয় হিচাপে বাছি লৈছিল পদপথ ৷ নলবাৰীৰ ৰে'ল ষ্টেচনত পৰি থকা অৱস্থাত পুনীৰাম খনিকৰ নামৰ বৃদ্ধ গৰাকীক নলবাৰীৰ স্থানীয় সাংবাদিক মজিবুৰ ৰহমানে উদ্ধাৰ কৰি বিগত 10 মাহে ভৰণ-পোষণৰ দায়িত্ব লয় ৷ সাংবাদিক গৰাকীয়ে বৃদ্ধগৰাকীক ঘৰলৈ পঠিয়াব বিচাৰিছিল যদিও দুই পুত্ৰ-কন্যাই পিতৃক আঁকোৱালি ল'বলৈ ইচ্ছা প্ৰকাশ কৰা নাছিল ৷ কিন্তু সাংবাদিক গৰাকীয়ে বিভিন্ন ধৰণে পুত্ৰ-কন্যাক বৃদ্ধগৰাকীৰ অৱস্থাৰ বিষয়ে জনাই আৰু ঘৰলৈ নিবৰ বাবে মান্তি কৰাই ৷

নলবাৰী,4 জুন : লখিমপুৰৰ এগৰাকী বৃদ্ধৰ কৰুণ কাহিনী ৷ নিজ পুত্ৰ-কন্যা আৰু বোৱাৰীৰ দ্বাৰা অৱহেলাৰ বলি হোৱা বৃদ্ধ গৰাকীয়ে আপোন ঘৰখনৰ পৰা ওলাই আহি শেষ আশ্ৰয় হিচাপে বাছি লৈছিল পদপথ ৷ অৱশেষত সপোনৰ ঘৰখনৰ পৰা এদিন ওলাই আহি নলবাৰীৰ ৰে'ল ষ্টেচনত পৰি থকা অৱস্থাত পুনীৰাম খনিকৰ নামৰ বৃদ্ধ গৰাকীক উদ্ধাৰ কৰিছিল নলবাৰীৰ স্থানীয় সাংবাদিক মজিবুৰ ৰহমানে ৷ লখিমপুৰ জিলাৰ পদুমনি গাঁৱৰ 90 বছৰীয়া বৃদ্ধ গৰাকীক উদ্ধাৰ কৰি সাংবাদিক ৰহমানে নিজৰ বৃদ্ধাশ্ৰাম শান্তি নিৱাস বৃদ্ধ ও অনাথ আশ্ৰমলৈ লৈ আহে ৷ বিগত 10 মাহে আশ্ৰামখনে ভৰণ-পোষণৰ দায়িত্ব লয় বৃদ্ধ গৰাকীৰ ৷

নিজ হাতেৰে খাদ্য খুৱাই নিজ পিতৃৰ দৰে মৰম আদৰ কৰি ৰখা পুনীৰাম খনিকৰৰ দুই পুত্ৰ আৰু জীয়াৰীৰ সৈতে যোগাযোগ কৰি সাংবাদিক গৰাকীয়ে বৃদ্ধগৰাকীক ঘৰলৈ পঠিয়াব বিচাৰিছিল যদিও দুই পুত্ৰ-কন্যাই পিতৃক আঁকোৱালি ল'বলৈ ইচ্ছা প্ৰকাশ কৰা নাছিল ৷ কিন্তু সাংবাদিক গৰাকীয়ে বিভিন্ন ধৰণে পুত্ৰ-কন্যাক বৃদ্ধগৰাকীৰ অৱস্থাৰ বিষয়ে জনাই আৰু ঘৰলৈ নিবৰ বাবে মান্তি কৰাই ৷ সেই উপলক্ষে বুধবাৰে দুই পুত্ৰই নিজৰ ভুল স্বীকাৰ কৰি পিতৃক নিজ ঘৰলৈ লৈ যোৱাৰ বাবে লিখিত প্ৰতিশ্ৰুতি দিয়ে সাংবাদিক গৰাকীক ৷

বুধবাৰে এক আৱেগিক পৰিৱেশৰ মাজতে বৃদ্ধগৰাকীক আশ্ৰমৰ পৰিচালক মজিবুৰ ৰহমানৰ লগতে আন আৱাসীসকলে বিদায় দিয়ে বৃদ্ধগৰাকীক ৷ পুনীৰাম খনিকৰেও আবেগিক হৈ হুকহুকাই কান্দিয়ে কেমেৰাৰ সন্মুখতে ৷

লগতে পঢ়ক: এইবাৰো নহয় মা কামাখ্যা মন্দিৰৰ বিশ্বপ্ৰসিদ্ধ অম্বুবাচী মেলা