নলবাৰী,28 জুন: কৰ’ণা মহামাৰীৰ সংক্ৰমণৰ বাবে বিবুধিত পৰিছে নলবাৰীৰ এটা দুখীয়া পৰিয়াল । বিগত ১৭ জুনত কোভিডত আক্ৰান্ত বুলি জিলাখনৰ স্বাস্থ্য বিভাগ,আৰক্ষী,চক্ৰ বিষয়া আদিকে ধৰি বহুকেইগৰাকী উচ্চ পদস্থ বিষয়াই বালিজাৰৰ ৰাহেমা বেগম নামৰ মহিলাগৰাকীক গুৱাহাটী চিকিৎসা মহাবিদ্যালয় হাস্পতাললৈ চিকিৎসাজনিত কাৰণত লৈ যায় ৷ কিন্তু এসপ্তাহৰ ভিতৰতে মাত্ৰ দুটা পৰীক্ষা কৰাৰ অন্তত ভাড়াতীয়া বাহনেৰে দেওবাৰে ঘৰত থৈ যায় ৰোগী গৰাকীক ৷ উক্ত ঘটনাৰ পিছতে অঞ্চলব্যাপী সৃষ্টি হৈছে তীব্ৰ প্ৰতিক্ৰিয়াৰ ৷ ইয়াৰ লগতে একেদিনাই মহিলাগৰাকীৰ স্বামী আলিমুদ্দিন আলীকো কোভিড পৰীক্ষাৰ বাবে স্বাস্থ্য বিভাগে লৈ গৈছিল যদিও এইপৰ্যন্ত ব্যক্তিগৰাকীৰ কোনো শুংসূত্ৰ নাই বুলি অভিযোগ উত্থাপন কৰিছে মহিলাগৰাকীয়ে ৷
আনহাতে, দম্পতীটোৰ পুত্ৰ জমচেৰ আলীয়ে দিয়া স্বীকাৰোক্তি অনুসৰি 2015 বৰ্ষৰ পৰা মাতৃ বিষৰোগত আক্ৰান্ত হৈ চিকিৎসা গ্ৰহণ কৰি আছিল । শেহতীয়াকৈ মহিলাগৰাকীৰ স্বাস্থ্যৰ অৱনতি ঘটাত ভৰ্তি কৰোৱা হয় জিএনআৰচি চিকিৎসালয়ত ৷ চিকিৎসালয়ত মহিলাগৰাকীৰ বুকু আৰু তেজৰ পৰীক্ষা কৰাৰ লগতে বায়’প্সী কৰিবলৈ চিকিৎসকে পৰামৰ্শ আগবঢ়ায় ৷ বায়’প্সীত মহিলাগৰাকীৰ শৰীৰত কৰ্কট ৰোগৰ অৱস্থিতি ধৰা পৰাত বি বৰুৱা কৰ্কট প্ৰতিষ্ঠানলৈ স্থানাস্তৰিত কৰাৰ পৰামৰ্শ আগবঢ়াই জিএনআৰচি কৰ্তৃপক্ষই । সেইমৰ্মে মহিলাগৰাকীক বি বৰুৱা কৰ্কট প্ৰতিষ্ঠানলৈ নিয়া হয় যদিও চিকিৎসালয় কৰ্তৃপক্ষই Covid 19 ৰ পৰীক্ষাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণৰ নিৰ্দেশ দিয়ে মহিলাগৰাকীৰ পৰিয়ালক ৷ চিকিৎসালয় কৰ্তৃপক্ষৰ নিৰ্দেশ অনুসৰি পৰিয়ালটোৱে গুৱাহাটী চিকিৎসা মহাবিদ্যালয় হাস্পতালত মহিলাগৰাকীৰ নমুনা পৰীক্ষাৰ বাবে গৈছিল ৷ চিকিৎসালয় কৰ্তৃপক্ষই মহিলাগৰাকীৰ নমুনা সংগ্ৰহৰ পিছতে ঘৰলৈ অহাৰ অনুমতি প্ৰদান কৰে ৷ 17 জুনত গুৱাহাটী চিকিৎসা মহাবিদ্যালয় হাস্পতাল কৰ্তৃপক্ষই ৰাহেমাৰ দেহত Covid 19 ৰ উপস্থিতি ধৰা পৰাৰ কথা পৰিয়ালক ব্যক্ত কৰে ৷ ফলত আৰক্ষী আৰু স্বাস্থ্য বিভাগৰ এটা দলে মহিলাগৰাকীক চিকিৎসাজনিত কাৰণত গুৱাহাটী চিকিৎসা মহাবিদ্যালয় হাস্পতাললৈ প্ৰেৰণৰ বাবে বালিজাৰস্থিত মহিলাগৰাকীৰ বাসগৃহত উপস্থিত হয় ৷ কিন্তু উক্ত ঘটনাৰ চৈধ্য দিন সম্পূৰ্ণ হোৱাৰ সলনি এসপ্তাহ পূৰ্ণ হোৱাৰ পিছতে এখন ভাড়াতীয়া বাহনেৰে মহিলাগৰাকীক অকলে ঘৰলৈ পঠিয়াই দিয়ে জিএমচিএইচ কৰ্তৃপক্ষই ৷ স্বাস্থ্য বিভাগৰ উক্ত কাণ্ডজ্ঞানহীনতাত চাঞ্চল্য সৃষ্টি হৈছে অঞ্চলটোৰ ৰাইজৰ মাজত ৷
অসম চৰকাৰৰ স্বাস্থ্য মন্ত্ৰী ডঃ হিমন্ত বিশ্ব শৰ্মাই বাৰে বাৰে কৰ’ণা মহামাৰীৰ বাবে উপযুক্ত ব্যৱস্থা গ্ৰহণৰ দাবী উত্থাপন কৰাৰ পিছত স্বাস্থ্য বিভাগৰ এই দায়িত্বজ্ঞানহীন কাণ্ডই চৰম ব্যৰ্থতাক প্ৰতিফলিত কৰিছে ৷ জমছেৰ আলীয়ে পিতৃৰ নিৰুদ্দেশৰ সম্পৰ্কত স্থানীয় চক্ৰ বিষয়া,যুটীয়া স্বাস্থ্য সেৱা সঞ্চালক,আৰক্ষীৰ তথা গাঁওবুঢ়াৰ লগত যোগাযোগ কৰিও কোনো সদুত্তৰ লাভ নকৰা বুলি অভিযোগ উত্থাপন কৰিছে ৷ উল্লেখ্য যে জমছেৰৰ মাতৃক কোভিড 19 ত আক্ৰান্ত হোৱাৰ বাবে সমগ্ৰ পৰিয়ালটোক হোম কোৱাৰেণ্টাইনৰ নিৰ্দেশ দিছিল যদিও বিভাগীয় কৰ্তৃপক্ষই পৰিয়ালটোৰ কোনোধৰণৰ খা-খবৰ নকৰাৰ অভিযোগ উত্থাপন হৈছে ৷ তদুপৰি যদিহে মহিলাগৰাকী কৰ’ণাত আক্ৰান্ত হৈছিল তেন্তে এসপ্তাহ পিছতে সুস্থ হৈ উঠাৰ কথা কিমানদুৰ গ্ৰহণযোগ্য সেয়া বৰ্তমান সন্দেহৰ আৱৰ্তত ৷ সম্প্ৰতি মহিলাগৰাকীৰ কোভিড পৰীক্ষাৰ ফলাফল সম্পৰ্কতো এয়া সঁচা নে ভুৱা আছিল তেনে বিষয়ক বহু প্ৰশ্ন উত্থাপিত হৈছে ৷
লগতে চাওকঃ জলমগ্ন কাজিৰঙা : বাগৰি বনাঞ্চলত উদ্ধাৰ গঁড়ৰ মৃতদেহ
