নলবাৰী,13 এপ্ৰিলঃ ৰঙালী বিহুৰ সংক্ৰান্তিৰ দিনা অৰ্থাৎ সোমবাৰে নলবাৰীত উপস্থিত মুখ্যমন্ত্ৰী সৰ্বানন্দ সোণোৱাল । সোমবাৰে বিয়লিৰ ভাগত জিলা উপায়ুক্তৰ কাৰ্যালয়ত মুখ্যমন্ত্ৰী গৰাকী উপস্থিত হৈ স্বাস্থ্য বিভাগকে ধৰি বিভিন্ন বিভাগৰ বিষয়াসকলৰ সৈতে এক বৈঠকত মিলিত হয় । বৈঠকৰ অন্তত সাংবাদিকক সম্বোধন কৰি মুখ্যমন্ত্ৰী সোণোৱালে প্ৰধানমন্ত্ৰী নৰেন্দ্ৰ মোদীৰ আহ্বানৰ প্ৰতি সঁহাৰি জনাই ৰাজ্যবাসীয়ে সামাজিক দূৰত্ব বজাই ৰাখি লক ডাউন পালন কৰাৰ বাবে কৃতজ্ঞতা জ্ঞাপন কৰে ৷ লগতে জৰুৰীকালীন সেৱাত জড়িত প্ৰত্যেককে ধন্যবাদ জ্ঞাপন কৰে । মুখ্য়মন্ত্ৰী গৰাকীয়ে শেহতীয়া পৰিস্থিতিৰ ক্ষেত্ৰত ৰাজ্যৰ সকলো ৰাজনৈতিক দলে দেখুওৱা দৃঢ়তাৰ বাবে ধন্যবাদ জনায় ৷
সমান্তৰালকৈ ৰাজ্যবাসীক পৰিষ্কাৰ-পৰিচ্ছন্নকৈ থাকি পৰিয়ালৰ মাজতে বিহু পালনৰ বাবে আহ্বান জনায় । ইফালে লক ডাউন শিথিল কৰাৰ সন্দৰ্ভত সাংবাদিকে সোধা প্ৰশ্নৰ উত্তৰত কেন্দ্ৰীয় চৰকাৰৰ নীতি-নিৰ্দেশনা অনুসৰণ কৰা হ’ব বুলি উল্লেখ কৰে মুখ্যমন্ত্ৰী গৰাকীয়ে ৷
