নলবাৰী, 29 জুন : শেহতীয়াভাৱে হোৱা নেৰানেপেৰা বৰষুণৰ ফলত উফন্দি উঠিছে বৰলীয়া নৈৰ জলপৃষ্ঠ ৷ নৈখনৰ বাঢ়নী পানীৰ কোবাল সোঁতে কেমেৰাৰ সন্মুখতে উটি গ'ল কামৰূপ আৰু নলবাৰী জিলা সংযোগী বৰলীয়া নৈৰ দলংখন ৷
বৰক্ষেত্ৰী আৰু হাজো সমষ্টিৰ সীমান্তৰ ভঁৰালটোলাৰ জৰাজীৰ্ণ কাঠৰ দলংখনেই আছিল জনসাধাৰণৰ একমাত্ৰ যাতায়াতৰ সম্বল ৷ কিন্তু বৰলীয়া নৈৰ বাঢ়নী পানীৰ কালমূৰ্তিয়ে নিমিষতে চাৰখাৰ কৰি পেলালে নৈখনৰ দুই পাৰৰ লোকৰ যাতায়াত ৷ নৈখনৰ সংহাৰী ৰূপৰ ফলত এতিয়া যাতায়তৰ নামত জীয়াতু ভুগিছে দুয়োখন জিলাৰ লোক ৷ বৃহত্তৰ কৃষি প্ৰধান অঞ্চলটোৰ ৰাইজে ভৰ বাৰিষা নৈখন পাৰ হৈ খেতিপথাৰলৈ যোৱাৰ লগতে ব্যৱসায়-বাণিজ্যতো সৃষ্টি হৈছে সমস্যা ৷ নৈখন পাৰ হৈ আহ-যাহ কৰিবলৈ বিকল্প পথ বিচাৰি ৰাইজে অতিক্ৰম কৰিবলগীয়া হৈছে প্ৰায় ৫-৬ কিলোমিটাৰ বাট ৷
উল্লেখ্য যে, বছৰ বছৰ ধৰি নৈখনৰ দুয়োপাৰৰ ৰাইজে নৰক যন্ত্ৰণা ভুগি অহাৰ পিছত প্ৰায় এবছৰ পূৰ্বে বৰক্ষেত্ৰী সমষ্টিৰ বিধায়ক নাৰায়ণ ডেকাই উক্ত দলংখন পকীকৰণৰ উদ্দেশ্যে স্থাপন কৰিছিল আধাৰশিলা ৷ পিছে দলং পকীকৰণ হোৱাটো দূৰৰে কথা আজিও আৰম্ভই নহ'ল পকী দলঙৰ নিৰ্মাণকাৰ্য ৷ দলং নিৰ্মাণৰ নামত এমুঠি শিল-বালিও নপৰিল উক্ত স্থানত ৷ সেয়ে পুনৰ বিপদসংকুলভাৱে দুই পাৰৰ ৰাইজে অব্যাহত ৰাখিছিল অহা-যোৱা ৷ কিন্তু শেহতীয়াভাৱে নৈখনৰ বাঢ়নী পানীয়ে ভূতৰ ওপৰত দানৱ পৰাৰ দৰে জৰাজীৰ্ণ কাঠৰ দলংখনো উটুৱাই নিয়াত যাতায়াতৰ নামত হাহাকাৰৰ সৃষ্টি হৈছে জনসাধাৰণৰ মাজত ৷
