নলবাৰী, 10 জুনঃ অৱশেষত ইটিভি ভাৰত অসমৰ বাতৰিৰ পিছতে গা লৰিল নলবাৰী জিলা গড়কাপ্তানি বিভাগৰ ৷ উল্লেখযোগ্য যে, নলবাৰী চহৰৰ বৰকুৰা চ'কৰ পৰা ইণ্ডাষ্ট্ৰী চ’ক হৈ গোপাল বজাৰ সংযোগী জৰাজীৰ্ণ পথচোৱাৰ সন্দৰ্ভত ইটিভি ভাৰত অসমত বাতৰি সম্প্ৰচাৰ কৰা হয় ৷ তাৰ পিচতে গড়কাপ্তানি বিভাগৰ পৰা পথচোৱা নিৰ্মাণৰ বাবে চৰকাৰে প্ৰায় কোটি টকা আৱন্টন দিয়ে ৷ কিন্তু নলবাৰী সমষ্টিৰ বিধায়ক অশোক শৰ্মাৰ অতি ঘনিষ্ঠ আৰু আশীৰ্বাদপুষ্ট ঠিকাদাৰ জ্যোতিপ্ৰসাদ বৈশ্যই নিজ খেয়ালখুছি আৰু মইমতালিৰে পথচোৱা নিৰ্মাণ কৰাৰ বাবেই ছয়মাহ পিছৰ পৰা পথটো জহিখহি যোৱাৰ অভিযোগ ৰাইজৰ ৷
এই সন্দৰ্ভত ই টিভি ভাৰত অসমত দেওবাৰে বাতৰি সম্প্ৰচাৰ হোৱাৰ পিছতেই পথচোৱা মেৰামতিৰ কামত নাটকীয়ভাৱে তৎপৰ গড়কাপ্তানি বিভাগ ৷ সোমবাৰে ঠিকাদাৰে মুখ ঢাকিবলৈ পুৱাৰে পৰা টেক্টৰ-জেচিবি আদি লগাই শিল-বালি ঢালি পথচোৱা মেৰামতিৰ নাটক ৰচে ৷
