নলবাৰীত যৌতুকৰ বাবে বোৱাৰীক হত্যাৰ সন্দেহ

যৌতুকৰ বাবে বোৱাৰীক নিৰ্যাতন কৰি হত্যা নলবাৰীত ৷ আত্মহত্যাৰ ৰূপ দিয়াৰ চেষ্টা স্বামীগৃহৰ ৷ পিতৃগৃহৰ অভিযোগ,এয়া এক পৰিকল্পিত হত্যাকাণ্ড ৷

নলবাৰী, 2 আগষ্টঃ ৰাজ্যত পুনৰ বোৱাৰীক হত্যা ৷ নলবাৰী এলেঙ্গী অঞ্চলত বৃহস্পতিবাৰে এগৰাকী ৱোৱাৰীৰ ৰহস্যজনক মৃত্যুৱে সৃষ্টি কৰিছে ৰহস্যৰ ৷ এতিয়াও নিশ্চিত নহয় আত্মহত্যা নে পৰিকল্পিত হত্যাকাণ্ড ৷ শুৱালকুছিৰ পিতৃগৃহৰ অভিযোগ এয়া এক পৰিকল্পিত হত্যাকাণ্ড,স্বামী গৃহৰ মতে এয়া আত্মহত্যা ৷ ঘটনাৰ বিৱৰণী মতে,শুৱালকুছিৰ জোস্না কুমাৰী নামৰ এগৰাকী ছোৱালীয়ে দীৰ্ঘদিনীয়া প্ৰেমৰ অন্তত দুয়োখন ঘৰৰ সন্মতি ক্ৰমে ২০১৮ চনৰ মাৰ্চ মাহৰ ৭ তাৰিখে যুগ্ম জীৱনৰ পাতনি মেলিছিল নলবাৰীৰ এলেঙ্গী অঞ্চলৰ নৱ তালুকদাৰ নামৰ যুৱকজনৰ সৈতে ৷ কিন্তু বিয়াৰ পিছৰে পৰা কেইবাবাৰো শহুৰ পৰিয়ালে যৌতুক বিচাৰি ৱোৱাৰী জোস্নাৰ ওপৰত চলাইছিল শাৰীৰিক-মানসিক অত্যাচাৰ ৷ অৱশেষত অত্যাচাৰে চৰমসীমা অতিক্ৰম কৰাত বৃহস্পতিবাৰে জোস্নাই আত্মহত্যা কৰা বুলি খবৰ দিয়ে পিতৃগৃহক ৷

ইয়াৰ পিচতে জোস্নাৰ মৃতদেহ পিতৃগৃহৰ লোক আহি পোৱাৰ আগতেই মৰণোত্তৰ পৰীক্ষাৰ বাবে নলবাৰী শ্বহীদ মুকুন্দ কাকতি অসামৰিক চিকিৎসালয়ৰ মৰ্গলৈ যোৱা হয় ৷ ইফালে সমগ্ৰ ঘটনাটোৰ উচিত তদন্তৰ লগতে হত্যাকাৰীৰ কঠোৰ শাস্তি বিচাৰি মাতৃ পৰিয়ালে নিশাই নলবাৰী সদৰ থানাত দাখিল কৰিছে এখন এজাহাৰ ৷ পিছে আৰক্ষীৰ তদন্ততহে স্পষ্ট হব এয়া প্ৰকৃততে আত্মহত্যা নে হত্যাকাণ্ড !