আজি বিশ্ব হৃদ দিৱস ৷ প্ৰতিবছৰৰ ২৯ ছেপ্টেম্বৰৰ দিনটোত এই দিৱস বিশ্বজুৰি পালন কৰা হয় ৷ বিশ্বত ক্ৰমশঃ আশংকাজনকভাৱে বৃদ্ধি পোৱা হৃদৰোগৰ প্ৰতি জনসাধাৰণক সজাগ কৰাই এই দিৱস অনুষ্ঠিত কৰাৰ অন্যতম কাৰণ ৷
বিশ্ব স্বাস্থ্য সন্থাৰ মতে, প্ৰতিবছৰে ১৭.৯ নিযুত লোকৰ প্ৰাণনাশ হয় হৃদৰোগত ৷ শাৰীৰিক অনুশীলনৰ অভাৱ তথা মানসিক চাপৰ প্ৰকোপ বৃদ্ধি হৈ অহাৰ সমান্তৰালভাৱে বৃদ্ধি হৈ আছে হৃদৰোগজনিত সমস্যা ৷
আপুনি জানেনে হৃদপিণ্ড সম্পৰ্কীয় গুৰুত্বপূৰ্ণ এই তথ্য এটা দিনত আমাৰ হৃদপিণ্ড প্ৰায় ১ লাখবাৰলৈ ধপধপায় ৷ হৃদপিণ্ডই ৭৫ লাখ কোটি কোষলৈ ৰক্ত প্ৰদান কৰে ৷ হৃদপিণ্ডই এদিন যিমান শক্তি উৎপাদন কৰে, সেই শক্তিৰে এখন ট্ৰাক ৩৫ ৷
কিলোমিটাৰলৈ গমন কৰিব পাৰে ৷ গোটেই জীৱনজুৰি এটা হৃদপিণ্ডই ১১৯ কোটি লিটাৰ ৰক্ত পাম্প কৰে ৷ কিন্তু এনে হৃদপিণ্ডৰ লগতে আমি ধেমালি সুলভ ব্যৱহাৰ কৰো ৷ চিগাৰেট বা ধঁপাতজাতীয় সামগ্ৰী শৰীৰত লওঁ, যাৰ ফলত আমাৰ হৃদপিণ্ড দুৰ্বল হৈ পৰে ৷
হৃদৰোগজনিত সমস্যাৰ পৰা বাচিবলৈ কৰক এই মূল অভ্যাস প্ৰতিদিনে ৩০ মিনিট ব্যায়াম খোজ কঢ়া, জগিং, যোগ বা জিম- যিকোনো এটা আধাঘণ্টাৰ বাবে কৰাৰ অভ্যাস কৰক ৷ খাদ্য সজাগতা নিমখ কমকৈ খোৱাৰ অভ্যাস কৰক ৷ তেল বা চৰ্বীজাতীয় খাদ্য কমকৈ খাওক, লগতে ফাষ্টফুডৰ পৰা আঁতৰি থকাই মংগলজনক ৷ কেৱল এয়াই নহয় চিগাৰেট বা ধঁপাতজাতীয় সামগ্ৰী সদায়ে বৰ্জন কৰা উচিত ৷
মানসিক চাপ কমাবলৈ আধ্যাত্মিক কৰ্ম ধ্যান কৰিব পাৰে ৷ সাম্প্ৰতিক সমাজ-জীৱনৰ বাবে হৃদৰোগ এক গুৰুতৰ সমস্যা হৈ পৰিছে ৷ চাপযুক্ত জীৱন পৰিক্ৰমা ইয়াৰ অন্যতম শীৰ্ষ কাৰণ ৷ আজি দেশে-দেশে উদ্যাপিত হৈছে 'বিশ্ব হৃদ দিৱস ৷' জন্মৰে পৰা মৃত্যু পৰ্যন্ত মানুহৰ যিবোৰ অংগই অবিৰাম কাম কৰি থাকে তাৰ ভিতৰত অন্যতম হৈছে হৃদযন্ত্ৰ ৷
গতিকে, ইয়াক ৰোগমুক্ত কৰি ৰখাটো সকলো মানুহৰে দায়িত্ব ৷ আজিকালি মানুহে বিভিন্ন চাপৰ বোজা লৈ জীৱন যাপন কৰিবলগীয়া হয় ৷ কৰ্মক্ষেত্ৰৰ চাপ, প্ৰতিযোগিতামূলক জীৱনশৈলী, স্বাস্থ্যৰ বাবে ক্ষতিকাৰক খাদ্যাভাস, ধপাত তথা অন্যান্য মাদক দ্ৰৱ্যৰ আসক্তি আদিয়ে মানুহৰ হৃদযন্ত্ৰক দুৰ্বল কৰিছে ৷ শেহতীয়া এক সমীক্ষাত প্ৰকাশ পোৱা অনুসৰি ৮৩ শতাংশ হৃদৰোগৰ কাৰণ হৈছে এনেধৰণৰ জীৱনশৈলী ৷ জন্মগত বা অন্যধৰণে সংক্ৰমিত আৰু আক্ৰান্ত হৃদৰোগীৰ সংখ্যা তুলনামূলকভাৱে কম ৷
যদিও ভাৰতবৰ্ষত বছৰি মৃত্যু হোৱা সকলৰ ভিতৰত প্ৰায় ২৪.৮ শতাংশ হৃদৰোগী ৷ এয়া উদ্বেগৰ কাৰণ হৈ পৰিছে ৷ প্ৰকৃতিৰ ওপৰত মানুহৰ ক্ৰমবৰ্ধমান অত্যাচাৰকো হৃদৰোগৰ বাবে দায়ী কৰিছে বহু বিশেষজ্ঞই ৷ কিয়নো মানুহৰ শৰীৰৰ বাবে প্ৰয়োজনীয় অক্সিজেন উদাৰ প্ৰকৃতিয়ে বিনামূল্যে প্ৰদান কৰে ৷ কিন্তু প্ৰকৃতিৰ এই উদাৰতাৰ বিপৰীতে এচাম লোকে গছ-বন তহিলং কৰি সমাজ-জীৱনলৈ বিপদ নমাই আনিছে ৷
খোজকঢ়া, চাইকেল চালনা আৰু ব্যায়ামৰ অভ্যাস গঢ়ি তুলি আমি হৃদৰোগৰ পৰা ভালেখিনি হাত সাৰি থাকিব পাৰো বুলি বিশেষজ্ঞসকলে জানিবলৈ দিয়ে ৷
লগতে পঢ়ক: World Heart Day 2023: বিশ্ব হৃদযন্ত্ৰ দিৱস সন্দৰ্ভত জনা-নজনা কিছু কথা
