কলিয়াবৰ, 25 জুন : শুকুৰবাৰে নিশা ২ বাজি ৩০ মিনিটত অম্বুবাচীৰ নিবৃত্তি অনুসৰি নীলাচলৰ বুকুত থকা কামাখ্যা মন্দিৰৰ লগতে কলিয়াবৰৰ শিলঘাটত থকা দ্বিতীয় শক্তিপীঠ শ্ৰীশ্ৰী কামাখ্যা দেৱালয়ৰো বন্ধ হৈ থকা মন্দিৰৰ মূল দুৱাৰ খোল খাব । ক'ভিডসৃষ্ট পৰিৱেশৰ বাবে নীলাচলৰ বুকুত থকা কামাখ্যা মন্দিৰত বিগত বৰ্ষৰ লগতে এইবৰ্ষতো অনুষ্ঠিত নহ’ল অম্বুবাচী মেলা । কলিয়াবৰৰ শিলঘাটৰ দ্বিতীয় শক্তিপীঠ কামাখ্যা দেৱালয়ত সাতৰ এই সময়ছোৱাত মন্দিৰ স্থাপনৰ পৰা এই পৰ্যন্ত অনুষ্ঠিত হোৱা নাই অম্বুবাচী মেলা । কেৱল পালন কৰা হয় প্ৰবৃত্তি আৰু নিবৃত্তি ।
নীলাচলৰ বুকুত থকা কামাখ্যা দেৱালয়লৈ দৈনিক যিদৰে বহু ভক্তৰ সমাগম হয় তাৰ তুলনাত শিলঘাট কামাখ্যাত ভক্তৰ উপস্থিতি তেনেই সেৰেঙা দেখিবলৈ পোৱা যায় । দেৱী কামাখ্যাৰ বিগ্ৰহ থকা এই ঐতিহাসিক মন্দিৰৰ বিষয়ে প্ৰচাৰ সীমিত হোৱাৰ বাবেই এতিয়াও কম সংখ্যক লোকেহে জানে শিলঘাটত থকা অসমৰ দ্বিতীয় শক্তিপীঠ কামাখ্যা দেৱালয়ৰ কথা । কথিত আছে যে, অষ্টম শতিকাতে শালস্তম্ভ বংশীয় ৰজা বনমালদেৱে শিলঘাটৰ কামকূট এতিয়াৰ কামাখ্য পাহাৰত স্থাপন কৰিছিল কামাখ্যা মন্দিৰ ।
প্ৰাকৃতিক কাৰণত ধ্বংস হোৱা কামাখ্যা পীঠ পিছত আহোম ৰাজত্ব কালত ১৭৪৫ খ্ৰীষ্টাব্দত স্বৰ্গদেউ প্ৰমত্ত সিংহই শিলঘাটতে পুনৰ নিৰ্মাণ কৰে কামাখ্যা দেৱালয় । তাৎপৰ্যপূৰ্ণ যে, অসমৰ দ্বিতীয় শক্তিপীঠ শিলঘাটৰ কামাখ্যা দেৱালয়ৰ প্ৰচাৰ-প্ৰসাৰত যদি গুৰুত্ব দিয়া হয়, নিশ্চয়কৈ অদূৰ ভৱিষ্যতে এই মন্দিৰভাগক এক ধৰ্মীয় পৰ্যটন ক্ষেত্ৰ হিচাপে গঢ় দিব পৰা যাব।
