নগাঁও, 6 এপ্ৰিল: চৰকাৰী ধনৰেও খঁক নপলায় একাংশ বিষয়া-কৰ্মচাৰীৰ ৷ ৰাজ্যজুৰি দুৰ্নীতিগ্ৰস্ত চৰকাৰী-বিষয়া কৰ্মচাৰীৰ বিৰুদ্ধে তীব্ৰ অভিযান অব্যাহত থকাৰ পাচতো গা-লৰা নাই একাংশৰ ৷ এইবাৰ নগাঁৱত উৎকোচ লৈ জালত পৰিল দুৰ্নীতিগ্ৰস্ত আৰক্ষী বিষয়া (Police officer caught taking bribe) ৷
বুধবাৰে নিশা দুৰ্নীতি নিবাৰক শাখাই আটক কৰিলে নগাঁও সদৰ আৰক্ষী থানাৰ উপ পৰিদৰ্শক সুৰুজ উল হকক ৷ তথ্য অনুসৰি 15 হাজাৰ টকাৰ উৎকোচ লৈছিল খঁকোৱা উপ-পৰিদৰ্শক সুৰুজ উল হকে ৷ নগাঁও আৰক্ষী ছাউনীত থকা চৰকাৰী আবাসত উৎকোচ লৈছিল আৰক্ষী বিষয়া সুৰুজ উল হকে ৷ 15 হাজাৰ টকা উৎকোচ লোৱাৰ সময়তে হাতে-লোটে আটক কৰে দুৰ্নীতি নিবাৰক শাখাই (SI detained over bribery charge) ৷
জানিব পৰা মতে অৱসৰ গ্ৰহণৰ বাবে মাত্ৰ এটা মাহ আছিল সুৰুজ উল হকৰ ৷ অৱসৰ গ্ৰহণৰ পূৰ্বে সহজ উপায়েৰে ধন ঘটাৰ প্ৰচেষ্টা চলাইছিল এইগৰাকী আৰক্ষী বিষয়াই ৷ কিন্তু ধন ঘটাৰ জাল পেলাই নিজেই দুৰ্নীতি নিবাৰক শাখাৰ জালত পৰে আৰক্ষী বিষয়াজনে ৷
উৎকোচ গ্ৰহণৰ সময়ত হাতে-লোটে দুৰ্নীতি নিবাৰক শাখাই আটক কৰাৰ পাচতেই সুৰুজ উল হকক বুধবাৰে নিশা দীৰ্ঘ সময় ধৰি জেৰা চলায় দুৰ্নীতি নিবাৰক শাখাইৰ দলটোৱে ৷ দীঘলীয়া জেৰাৰ অন্তত পুৱতি নিশা আটকাধীন আৰক্ষী বিষয়া সুৰুজ উল হকক লগত লৈ গুৱাহাটী অভিমুখে ৰাওনা হয় অভিযানকাৰী দুৰ্নীতি নিবাৰক শাখাৰ দলটো (Police personal detained for accept bribe) ৷
উল্লেখ্য যে, উৎকোচ গ্ৰহণ কৰি সঘনাই দুৰ্নীতি নিবাৰক শাখা আৰু মুখ্যমন্ত্ৰী তদাৰকী কোষৰ জালত পৰিছে চৰকাৰী বিষয়া-কৰ্মচাৰী ৷ কিন্তু যেন একাংশ বিষয়া-কৰ্মচাৰীয়ে শিক্ষাই লোৱা নাই ৷ কিছুদিন পূৰ্বে উৎকোচ লৈ গুৱাহাটীত দুৰ্নীতি নিবাৰক শাখাৰ জালত পৰিছিল গুৱাহাটী পৌৰ নিগমৰ মুখ্য অভিযন্তা ৷
ইফালে, মুখ্যমন্ত্ৰী ড৹ হিমন্ত বিশ্ব শৰ্মাইয়ো দুৰ্নীতিগ্ৰস্ত বিষয়া কৰ্মচৰাকীক সকীয়নি প্ৰদান কৰি আহিছে ৷ কিন্তু মুখ্যমন্ত্ৰীৰ সকীয়নিকো যেন কেৰেপ নকৰে একাংশই ৷
লগতে পঢ়ক: Anti corruption Raid: গুৱাহাটীত উৎকোচ লৈ গ্ৰেপ্তাৰ হ’ল জলসিঞ্চন বিভাগৰ জ্যেষ্ঠ সহায়ক
