নগাঁও, 6 জুনঃ কেমেৰাৰ সন্মুখতেই হুকহুকাই কান্দিছে পিতৃ মাতৃৰ লগতে এগৰাকী মেধাৱী ছাত্ৰীয়ে ৷ নিজে নৃত্য কৰি পঢ়াৰ খৰচৰ লগতে পৰিয়ালটোকো কিছু সকাহ দিছিল ছাত্ৰীগৰাকীয়ে ৷ সম্প্ৰতি সুখ্যাতিৰে উত্তীৰ্ণ হোৱা ছাত্ৰীগৰাকীৰ অভিভাৱক পৰিছে দুঃচিন্তাত ৷ কিয়নো নিজ সন্তানৰ আশা পূৰণৰ বাবে হয়তো সামৰ্থ নাই অভিভাৱকৰ ৷
নগাঁৱৰ জাজৰি মাজগাঁও নভেটি অঞ্চলৰ এগৰাকী মেধাৱী ছাত্ৰী শিৱাণী বৰা ৷ শনিবাৰে ঘোষিত হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হৈছে শিৱাণী ৷ শিৱাণীৰ উত্তীৰ্ণৰ খবৰ পায়েই আৱেগিক হৈ পৰে পৰিয়ালৰ লোক ৷ কিয়নো মেধাৱী শিৱাণীক এখন আগশাৰীৰ শিক্ষানুষ্ঠানত নাম ভৰ্তি কৰিবলৈ সক্ষম নহয় তাইৰ পৰিয়ালটো ৷ তাইৰো সপোন ব্যক্তিগত খণ্ডৰ এখন আগশাৰীৰ শিক্ষানুষ্ঠানত নাম ভৰ্তি কৰিবলৈ ৷ আৰ্থিকভাৱে দুৰ্বল হোৱাৰ বাবেই কোনো টিউচন নোহোৱাকৈয়ে হাইস্কুল শিক্ষান্ত পৰীক্ষাত চকলাঘাট উচ্চতৰ মাধ্যমিক বিদ্যালয়ৰ পৰা সফলতাৰে উত্তীৰ্ণ হ'ল শিৱাণী ৷
শিৱাণীৰ পিতৃ পেছাত এগৰাকী কাঠমিস্ত্ৰী ৷ লোকৰ ঘৰত কাঠমিস্ত্ৰীৰ কাম কৰি কোনোমতে পৰিয়ালটো পোহপাল দি আছে ৰামনাথ বৰাই ৷ নিজ কন্যাৰ শিক্ষা সামগ্ৰী কিনিবলৈ মাতৃয়েও দুপৰ নিশালৈকে লোকৰ কাপোৰ চিলাই যোগাৰ কৰিছিল সামান্য ধন ৷ বহু সময়ত মাতৃ আইমণি বৰাই চিলাই কামত জড়িত হৈ সহায় কৰি আহিছিল পৰিয়ালটোক ৷ কিন্তু পিতৃ-মাতৃৰ ওপৰতে সমস্ত বোজা জাপি নিদি শিৱাণীয়ে নিজেও বিহু নৃত্য কৰি নিজৰ পঢ়াৰ খৰচ যোগাৰ কৰাৰ লগতে পিতৃ মাতৃকো সহায় কৰি আহিছিল ৷ তাৰ মাজতেই পঢ়ি আজি তাই সক্ষম হৈছে জীৱনৰ এক অন্যমত কঠিন পৰীক্ষাত সুখ্যাতিৰে উত্তীৰ্ণ হ'বলৈ ৷
