ৰূপহীহাট, ১৮ আগষ্ট : ড্ৰাগছকে (Drugs) ধৰি নিচাজাতীয় দ্ৰব্যৰ বিৰুদ্ধে সষ্টম হৈ থকাৰ লগতে অসম আৰক্ষীয়ে (Assam Police) আন আন অপৰাধমূলক কাৰ্যকলাপ ৰোধৰ বাবে অভিযান অব্যাহত ৰাখিছে । যাৰ পৰিণতিত যোৱা কেইটামান দিনত ৰাজ্যৰ ভিন্ন প্ৰান্তত ড্ৰাগছ সৰবৰাহকাৰী আটক হোৱাৰ সমান্তৰালকৈ বহু দুৰ্ধৰ্ষ চোৰ, ডকাইত আৰক্ষীৰ জালত পৰিছে । শেহতীয়াকৈ এটা কুখ্যাত ডকাইতক আটক কৰিবলৈ সক্ষম হৈছে নগাঁও আৰক্ষী ।
ৰূপহীহাটৰ জুৰীয়াত আৰক্ষীৰ তৎপৰতাত আটক কুখ্যাত ডকাইতটো । ধৃত ডকাইতটো হ'ল জুৰীয়াৰ ধিংবৰি চাপৰিৰ নুৰ মহম্মদ ৷ জিলাখনত সংঘটিত হোৱা বহুকেইটা অপৰাধৰ লগত জড়িত থকাৰ উপৰিও শেহতীয়াকৈ সুঁতিৰপাৰৰ গ্ৰাহক সেৱা কেন্দ্ৰত ধনৰ লুট-পাতৰ ঘটনা জড়িত আছিল এই কুখ্যাত ডকাইতটো ৷
প্ৰায় তিনি মাহৰ পূৰ্বে সুঁতিৰপাৰ গ্ৰাহক সেৱা কেন্দ্ৰত দুই ডকাইতে পিষ্টলেৰে গুলীচালনা কৰি গ্ৰাহক সেৱা কেন্দ্ৰৰ গৰাকী এলবাৰ্ট হুছেইনৰ পৰা লুটি নিছিল প্ৰায় ৩ লাখ টকা ৷ এই ঘটনাৰ পাছতে আৰক্ষীয়ে অধিক তৎপৰ হৈ পৰিছিল । দীৰ্ঘদিন ধৰি আৰক্ষীয়ে ডকাইত দুটাৰ সন্ধানত আছিল । কিন্তু পলাতক আছিল দুৰ্ধৰ্ষ ডকাইত কেইটা ।
অৱশেষত মঙলবাৰে জুৰীয়া আৰক্ষীয়ে গোপন খবৰৰ ভিত্তিত অভিযান চলাই আটক কৰে কুখ্যাত ডকাইত নুৰ মহম্মদক । আৰক্ষীয়ে ইতিমধ্যে নুৰ মহম্মদক সোধা-পোছা অব্যাহত ৰাখিছে । আৰক্ষী সূত্ৰৰ পৰা জানিব পৰা মতে নুৰ মহম্মদৰ পৰা বহু তথ্য লাভ কৰিব আৰক্ষীয়ে । যাৰ আধাৰত হয়তো পৰৱৰ্তী সময়ত নুৰ মহম্মদৰ বহু সহযোগীকো আৰক্ষীয়ে আটক কৰিবলৈ সক্ষম হ'ব ।
লগতে পঢ়ক: পুনৰ মহানগৰ আৰক্ষীৰ ফান্দত Drugs Peddler
