নগাঁও,13 ছেপ্তেম্বৰঃযি সময়ত ৰাজ্যত কৰ'ণাই ভয়াৱহ ৰূপ ধাৰণ কৰিছে সেই সময়তে এখন চৰকাৰী বিদ্যালয়ত মধ্যাহ্ন ভোজনৰ চাউলৰ বাবে ওলাই আহিল শ শ ছাত্ৰ-ছাত্ৰী, অভিভাৱক আৰু স্থানীয় ৰাইজ । এই ঘটনা সংঘটিত হৈছে বটদ্ৰৱা প্ৰাথমিক শিক্ষা খণ্ডৰ অন্তৰ্গত হাইডুবী ৰামপুৰ সত্ৰ বালক এম ই মাদ্ৰাছাত ৷
জানিব পৰা মতে, বিদ্যালয় খনৰ প্ৰধান শিক্ষকৰ পদক লৈ বিগত প্ৰায় পাঁচমাহে টনা আঁজোৰা চলি থকাৰ বাবেই বিদ্যালয় খনৰ শ শ ছাত্ৰ-ছাত্ৰীয়ে মধ্যাহ্ন ভোজনৰ পৰা বঞ্চিত হৈ আহিছে ৷ তদুপৰি বিদ্যালয়ৰ প্ৰধান শিক্ষক জনে অৱসৰ লোৱাৰ পিছত বিদ্যালয়খনৰ জ্যেষ্ঠ শিক্ষক আলী আজমক শিক্ষা বিভাগে দিছিল ভাৰপ্ৰাপ্ত শিক্ষকৰ দায়িত্ব । কিন্তু ইয়াৰ কিছুদিন পিছতেই শিক্ষা বিভাগে ছফিকুল ইছলাম চৌধুৰী নামৰ আন এজন শিক্ষকক স্থায়ী প্ৰধান শিক্ষক হিচাপে নিযুক্তি প্ৰদান কৰে ।
ইফালে আলী আজম নামৰ শিক্ষকজনে প্ৰধান শিক্ষকৰ দায়িত্ব চমজাই নিদিয়াৰ বাবেই বিদ্যালয়ৰ ছাত্ৰ ছাত্ৰীয়ে পোৱা নাই মধ্যাহ্ন ভোজনৰ চাউল । যাৰ পৰিপ্ৰেক্ষিতত শনিবাৰে বটদ্ৰৱা প্ৰাথমিক শিক্ষা খণ্ড বিষয়াই বৰ্তমানৰ প্ৰধান শিক্ষক ছফিকুল ইছলাম চৌধুৰীক লগত লৈ উপস্থিত হয় বিদ্যালয়ত ৷ সেই সময়ত বিদ্যালয়খনত মধ্যাহ্ন ভোজনৰ চাউল বিতৰণ কৰি থকা অৱস্থাতেই এক অনাকাংক্ষিত পৰিস্থিতিৰো সৃষ্টি হয় ।
ইপিনে বটদ্ৰৱা প্ৰাথমিক শিক্ষা খণ্ডৰ বিষয়াজনে নিজৰ মইমতালিৰে বিদ্যালয় খন পৰিচালনা কৰি অহাৰ অভিযোগ কৰে স্থানীয় ৰাইজৰ ৷ সেয়েহে শিক্ষা বিষয়া বাহাৰুল ইছলামৰ বিৰুদ্ধে ক্ষোভ প্ৰকাশ কৰি প্ৰতিবাদ সাব্যস্ত কৰে স্থানীয় ৰাইজে । আনহাতে,প্ৰতিবাদস্থলীৰ পৰিস্থিতি ইমানেই উত্তপ্ত হৈ পৰে যে বিদ্যালয়খনত বটদ্ৰৱা আৰক্ষী আৰু অৰ্ধ সামৰিক বাহিনী উপস্থিত হৈ পৰিস্থিতি নিয়ন্ত্ৰণ কৰিবলগীয়া হয় ৷ অভিযোগ-প্ৰতি অভিযোগক লৈ শিক্ষা বিভাগে হস্তক্ষেপ কৰি এই সমগ্ৰ বিষয় সন্দৰ্ভত কেনেধৰণৰ পদক্ষেপ গ্ৰহণ কৰে সেইয়া হ'ব লক্ষণীয় ৷
লগতে পঢ়কঃসৰ্বভাৰতীয় পৰীক্ষাৰ বাবে বিনামূলীয়াকৈ সাজু কৰা হ’ব দৰিদ্ৰ ছাত্ৰক
