নগাঁও, 5 মে' : নগাঁৱৰ কলিয়াবৰত চাৰিলেনযুক্ত পথৰ নিৰ্মাণ কাৰ্য চলি থকাৰ সময়তে নিৰ্মাণ কাৰ্যত হোৱা গাফিলতিয়ে চকু কঁপালত তুলিছে ৰাইজৰ ৷ চিমপেলক্স নামৰ ঠিকাদাৰ প্ৰতিষ্ঠানটোৰ দ্বাৰা নিৰ্মিয়মান অৱস্থাত থকা কলিয়াবৰ তিনিআলিৰ হাতীগাঁৱৰ পৰা চামগুৰিৰ গটঙালৈকে থকা অতি ব্যস্ত পথচোৱাৰ দুৰৱস্থাৰ বাবে হাৰাশাস্তি ভুগিছে ৰাইজে ৷ 37নং ৰাষ্ট্ৰীয় ঘাইপথটোৰ দুয়োকাষে চাৰিলেনযুক্ত পথৰ সমান্তৰালকৈ উপপথ নিৰ্মাণৰ কাম একেলগে হাতত লোৱাত এতিয়া যাতায়তৰ ক্ষেত্ৰত যথেষ্ট অসুবিধাৰ সৃষ্টি হোৱা পৰিলক্ষিত হৈছে । সৰ্বসাধাৰণ ৰাইজৰ অভিযোগ, সাতত্ৰিশ নম্বৰ ৰাষ্ট্ৰীয় ঘাইপথৰ যিকোনো একাষে যদি নিয়াৰিকৈ কাম সম্পূৰ্ণ কৰিলেহেঁতেন তেতিয়া স্থানীয় ৰাইজৰ কোনো ধৰণৰ অসুবিধা নহলেহেঁতেন । কিন্তু তাকে নকৰি "চিমপেলক্স" নামৰ নিৰ্মাণকাৰী প্ৰতিষ্ঠানটোৰ একাংশ কৰ্মচাৰীয়ে নিজৰ মইমতালিৰে পথৰ দুয়ো দিশে এক্সেভেটৰৰে মাটি খান্দি পথ নিৰ্মাণ কৰাত যথেষ্ট সমস্যাৰ সৃষ্টি হৈছে পথচাৰীৰ মাজত ।
আনহাতে পথটোৰ বিপৰীত দিশত এচপৰাও মাটি নেপেলাই সম্পূৰ্ণ 37 নং ৰাষ্ট্ৰীয় ঘাইপথৰ পৰা বহু দকৈ এটি উপপথ ব্যৱহাৰৰ বাবে ৰাখিছে যদিও পথটোত যিকোনো মূহুৰ্ততে দুৰ্ঘটনা সংঘটিত হোৱাৰ আশংকা ঘনীভূত হৈছে ।ইপিনে ৰাইজৰ দুৰ্দশাক আওকাণ কৰি কেৱল সম্পূৰ্ণ নিজস্ব মইমতালিৰে লেহেমীয়া গতিত পথচোৱা নিৰ্মাণৰ কাম চলাই গৈছে "চিমপেলক্স" নামৰ প্ৰতিষ্ঠানটোৱে ৷
