নগাঁও, ১৯ মাৰ্চ : নগাঁও আৰক্ষীৰ বৃহৎ সফলতা । আৰক্ষীৰ জালত পৰিল দীৰ্ঘদিনে অসম আৰক্ষীৰ চকুত ধূলি দি নগাঁও আৰু কাৰ্বি আংলং জিলাৰ বিভিন্ন প্ৰান্তত নানা অপৰাধমূলক কাৰ্যকলাপ সংঘটিত কৰি অহা ম'ষ্ট ৱাণ্টেড অপৰাধী (Most wanted criminal arrested in Nagaon) ।
দীৰ্ঘদিনৰ অন্তত অৱশেষত নগাঁও আৰক্ষীয়ে গ্ৰেপ্তাৰ কৰে জেকী বাৰ্থ কে চাংমা নামৰ দুৰ্ধৰ্ষ অপৰাধীটোক । নগাঁৱৰ ভাৰপ্ৰাপ্ত আৰক্ষী অধীক্ষক ধ্ৰুৱ বৰাৰ নেতৃত্বত আৰক্ষীৰ এটা দলে শুকুৰবাৰে অভিযান চলাই দুৰ্ধৰ্ষ অপৰাধী চাংমাক গ্ৰেপ্তাৰ কৰিবলৈ সক্ষম হয় (Most Wanted Jackie Barth K Sangma arrested)।
এক গোপন সূত্ৰৰ তথ্যৰ ভিত্তিত নগাঁও আৰক্ষীৰ দলটোৱে আমচৈৰ গাৰোগাঁৱত চলাইছিল অভিযান । গাৰোগাঁৱত চলোৱা এই অভিযানতে ম'ষ্ট ৱাণ্টেড অপৰাধীটোক কৰায়ত্ত কৰিবলৈ সক্ষম হয় আৰক্ষী । ধৃত জেকী বাৰ্থ কে চাংমাৰ পৰা আৰক্ষীয়ে বৃহৎ পৰিমাণৰ অস্ত্ৰ-শস্ত্ৰও উদ্ধাৰ কৰিবলৈ সক্ষম হয় ।
নগাঁও আৰু কাৰ্বি আংলং জিলাত একপ্ৰকাৰ তাণ্ডৱ সৃষ্টি কৰি অহা অপৰাধীটোৰ পৰা আৰক্ষীৰ দলটোৱে দুটা হস্তনিৰ্মিত পিষ্টল আৰু ৮ জাই সজীৱ গুলী, দুখন খুকুৰি আৰু দুখন তৰোৱালকে ধৰি বহু অস্ত্ৰ-শস্ত্ৰ উদ্ধাৰ কৰিবলৈ সক্ষম হয় ।
উল্লেখ্য যে, পশ্চিম কাৰ্বি-আংলঙৰ বনাঞ্চলৰ বহু অপৰাধজনিত কাৰ্যকলাপত জড়িত আছিল ধৃত জেকী বাৰ্থ কে চাংমা । চাংমাৰ বিৰুদ্ধে বন্যপ্ৰাণী হত্যাৰো অভিযোগ আছে । ইতিমধ্যে নগাঁও আৰক্ষীয়ে জেকী বাৰ্থ কে চাংমাক মাৰাথন জেৰা আৰম্ভ কৰিছে ।
ইফালে একেদিনাই আন এটা অভিযানত নগাঁৱৰ মধুপুৰৰ পৰা ইনামূল হুছেইন নামৰ এটা গভাইত চোৰকো আটক কৰিবলৈ সক্ষম হয় নগাঁও আৰক্ষী (Thief arrested in Nagaon) । বৃহস্পতিবাৰে নিশা মধুপুৰৰ এখন বিপণীত সংঘটিত চুৰিৰ ঘটনা সন্দৰ্ভত অভিযান চলাই ইনামূল হুছেইন নামৰ চোৰটোক আটক কৰিবলৈ সক্ষম হয় আৰক্ষী । ধৃত ইনামূলৰ পৰা চুৰি সামগ্ৰীৰ লগতে বহু নগদ ধন জব্দ কৰিবলৈ সক্ষম হয় আৰক্ষী ।
লগতে পঢ়ক : Garigaon gang rape case : পলাতক দুই ধৰ্ষণকাৰীক মৰিগাঁৱত গ্ৰেপ্তাৰ
