চামগুৰি,23 ফেব্ৰুৱাৰী: আন্তঃৰাষ্ট্ৰীয় ক্ৰীড়াত নাম অন্তৰ্ভূক্ত কৰিবলৈ সক্ষম হৈছে নগাঁৱৰ এজন যুৱকে ৷ নগাঁৱৰ চামগুৰি থানাৰ অন্তৰ্গত কঠালগুৰি-চাৰমুং গাঁৱৰ অম্লানজ্যোতি জি ম'মিনে নিজৰ প্ৰতিভাৰে অঞ্চলটোলৈ কঢ়িয়াই আনিছে গৌৰৱ ৷
৪ মাৰ্চৰ পৰা চুবুৰীয়া দেশ নেপালত অনুষ্ঠিত হ'বলগীয়া ‘ইণ্ডো-নেপাল গেমছ ২০২১’ ৰ ফুটবল প্ৰতিযোগিতাত ভাৰতৰ হৈ প্ৰতিদ্বন্দ্বিতা কৰিব অম্লানজ্যোতিয়ে ৷ প্ৰতিযোগিতাখনৰ বাবে সম্প্ৰতি কঠোৰ অনুশীলনত ব্যস্ত অম্লান ৷ অতি দৰিদ্ৰ পৰিয়ালৰ অম্লানৰ এই সফলতাই গৌৰৱান্বিত কৰি তুলিছে পিতৃ-মাতৃক ৷
আনহাতে, অম্লানে এই সফলতাৰ কৃতিত্ব পিতৃ-মাতৃৰ লগতে প্ৰশিক্ষক মণি কুমাৰ শ্ৰেষ্ঠাক প্ৰদান কৰে ৷ সম্প্ৰতি পুৰণিগুদামৰ ড৹ বিৰিঞ্চি কুমাৰ বৰুৱা মহাবিদ্যালয়ত অধ্যয়নৰত উদীয়মান ফুটবল খেলুৱৈ অম্লানে সপ্তম শ্ৰেণীৰ পৰাই ফুটবল খেলৰ প্ৰতি আকৰ্ষিত হৈছিল ৷ কিন্তু পৰিয়ালৰ আৰ্থিক দৈন্যতাৰ বাবে বিগত তিনিবছৰৰ পৰাহে ফুটবলৰ আনুষ্ঠানিক প্ৰশিক্ষণ গ্ৰহণ কৰিছে অম্লানে ৷
