নগাঁও,22 আগষ্টঃ অভিনেতা যতীন বৰাই পুনৰ বিজেপিত যোগদান কৰাক কেন্দ্ৰ কৰি ৰাজ্যজুৰি অব্যাহত আছে প্ৰতিক্ৰিয়া ৷ ইয়াৰ মাজতেই শনিবাৰে অসম জাতীয়তাবাদী যুৱ ছাত্ৰ পৰিষদৰ নগাঁও জিলা সমিতিৰ সভাপতি কাশ্যপ ফুকনে তেখেতৰ বিৰুদ্ধে ক্ষোভ উজাৰে ৷ ‘কা’ বিৰোধী আন্দোলনক আৱেগিক সিদ্ধান্ত আখ্যা দি অভিনেতাগৰাকীয়ে পুনৰ বাৰ বিজেপিত যোগদান কৰা কাৰ্যক তীব্ৰ ভাষাৰে গৰিহনা দিয়ে অসম জাতীয়তাবাদী যুৱ ছাত্ৰ পৰিষদৰ নগাঁও জিলা সমিতিয়ে ৷ ইয়াৰ বাবে তেখেতক আদৰ্শহীন তথা মেৰুদণ্ডহীন বুলিও আখ্যা দিয়ে কাশ্যপ ফুকনে ৷
নগাঁৱৰ সমগ্ৰ বিদ্যালয় তথা মহাবিদ্যালয় ছাত্ৰসমাজৰ উপৰিও অন্যান্য দল সংগঠনসমূহে ইতিমধ্যে অভিনেতা যতীন বৰাক ত্যাগ কৰিছে বুলি মন্তব্য কৰে কাশ্যপ ফুকনে ৷ তেখেতে আৰু কয় যে, ইয়াৰ পৰৱৰ্তী সময়ত অভিনেতাগৰাকীয়ে নগাঁৱত ভৰি দিলে তেখেতৰ বাসগৃহৰ সন্মুখতে তীব্ৰ প্ৰতিবাদ সাব্যস্ত কৰা হ’ব ৷
