নগাঁও, 1 জুলাই : নগাঁৱৰ খালৈগাঁও আঞ্চলিক ক্ৰীড়া সন্থাৰ খেলপথাৰৰ আধাৰশিলা স্থাপন বটদ্ৰৱাৰ বিধায়িকা আঙুৰলতা ডেকাৰ ৷ নগাঁৱৰ বেবেজীয়াৰ খালৈগাঁও আঞ্চলিক ক্ৰীড়া সন্থাৰ খেলপথাৰ উন্নীতকৰণৰ কামৰ বাবে সোমবাৰে স্থাপন কৰা হয় আধাৰশিলা ৷
মুখ্যমন্ত্ৰীৰ গ্ৰাম বিকাশ যোজনাৰ অধীনত ২০ লাখ টকা ব্যয়েৰে নিৰ্মাণ হ'বলগীয়া এই আধাৰশিলা স্থাপন কৰি বিধায়িকাগৰাকীয়ে কয় যে, "বটদ্ৰৱা সমষ্টিৰ বৃহত্তৰ খালৈগাঁও অঞ্চলত অতীজৰে পৰা ক্ৰীড়াৰ এক বাতাৱৰণ বিৰাজমান হৈ আছে । খেলপথাৰখনৰ উন্নীতকৰণে অঞ্চলৰ উদীয়মান ক্ৰীড়াবিদ সকলৰ দীৰ্ঘদিনীয়া প্ৰয়োজন পূৰণ কৰিব পাৰিব বুলি মই আশাবাদী ।"
খালৈগাঁও আঞ্চলিক ক্ৰীড়া সন্থাৰ সভাপতি শিৱৰাম বৰদলৈয়ে সভাপতিত্ব কৰা আধাৰশিলা স্থাপন অনুষ্ঠানটিৰ আঁতধৰে নেত্ৰকমল মহন্তই আৰু অনুষ্ঠানত নগাঁও জিলা ক্ৰীড়া বিষয়াৰ প্ৰতিনিধি হিচাবে অংশগ্ৰহণ কৰে ৰিংকুমণি বৰাই ৷
