কলিয়াবৰ, 18 জুন : অহা বিত্তীয় বৰ্ষৰ বাজেটত স্থান পাব অসম সমবায় মৰাপাট কলৰ উন্নয়নৰ প্ৰসংগই ৷ মঙলবাৰে অসম সমবায় মৰাপাট কল, শিলঘাট পৰিদৰ্শন কৰি এই মন্তব্য কৰে সমবায় মন্ত্ৰী ৰিহণ দৈমাৰীয়ে ৷ অসমৰ উদ্যোগসমূহৰ দুৰৱস্থাৰ সময়ত গৌৰৱেৰে মূৰ তুলি থকা সমবায় ভিত্তিত প্ৰতিষ্ঠা হোৱা অসম সমবায় মৰাপাট কল উদ্যোগটো পৰিদৰ্শন কৰি কলটোৰ উৎপাদন প্ৰক্ৰিয়াৰ বুজ লোৱাৰ লগতে সমবায় কলটোৰ অংশীদাৰ, বিষয়-ববীয়া তথা বিষয়া কৰ্মচাৰীৰ প্ৰতিনিধিৰ সৈতেও আলোচনাত মিলিত হয় ৷ য'ত কলটোৰ বিভিন্ন সমস্যাৰ লগতে ভৱিষ্যতৰ কাৰ্যপন্থাৰ বিষয়ে গুৰুত্বসহকাৰে আলোচনা কৰা হয় । বছৰ-বছৰ ধৰি কলটোত ব্যৱহাৰ হৈ থকা যন্ত্ৰসমূহ সলনি কৰি অত্যাধুনিক যন্ত্ৰ ব্যৱহাৰ কৰি উৎপাদন বঢ়োৱাৰ বাবে চৰকাৰে ব্যৱস্থা ল'ব বুলি কল পৰিচালনা কৰ্তৃপক্ষক আশ্বাস দিয়ে মন্ত্ৰীগৰাকীয়ে ।
ইপিনে আজিৰ দিনটোতে শতবৰ্ষ গৰকিবলৈ আগবঢ়া ৰাজ্যৰ পুৰণি সমবায় সমিতি ভলাগুৰি সমবায় সমিতিৰ কাৰ্যালয়ো পৰিদৰ্শন কৰে মন্ত্ৰীগৰাকীয়ে ৷ স্থানীয় বিধায়কক লগত লৈ মন্ত্ৰীগৰাকীয়ে সমবায় সমিতিৰ কাৰ্যালয় পৰিদৰ্শন কৰি শতবৰ্ষ অনুষ্ঠানত সকলো ধৰণৰ সহায়-সহযোগিতা আগবঢ়াব বুলি সমিতিখনৰ বিষয়-ববীয়াক প্ৰতিশ্ৰুতি দিয়ে ।
