ৰহা, ৪ ডিচেম্বৰ: 'অসমৰ জাতীয় জীৱনৰ গণ সংগ্ৰামৰ ধাৰাত শক্তিশালী সৈন্য হ'ব খোজো, স্বাভিমানী জাতিৰ সন্তান হ'ব খোজো। যাতে এই সন্তানক লৈ অসম মাতৃয়ে গৌৰৱ কৰিব পাৰে ।' শুক্ৰবাৰে ৰহাৰ নতুন চাৰিআলিত অনুষ্ঠিত বিদায় সভাত অংশগ্ৰহণ কৰি এই বক্তব্য আগবঢ়ায় আছুৰ প্ৰাক্তন সাধাৰণ সম্পাদক লুৰিণজ্যোতি গগৈয়ে । বৃহস্পতিবাৰে লুৰিণজ্যোতি গগৈয়ে সদৌ অসম ছাত্ৰ সন্থাৰ পৰা আনুষ্ঠানিকভাৱে বিদায় লয় ।
শুক্ৰবাৰে ৰহা আঞ্চলিক ছাত্ৰ সন্থাই এক বিদায় সভাৰ আয়োজন কৰি বিদায় জনায় আছুৰ প্ৰাক্তন সাধাৰণ সম্পাদকগৰাকীক । 'কা' আন্দোলনৰ অন্যতম নেতা তথা আছুৰ প্ৰাক্তন সাধাৰণ সম্পাদকগৰাকী বিদায় বেলাত আবেগিক হৈ পৰে । আছুৰ মজিয়াৰ পৰা বিদায় ল'লেও সংগঠনটোৰ প্ৰতি থকা আবেগ, শ্ৰদ্ধা কেতিয়াও শেষ নহয় আৰু অসমীয়া জাতিৰ স্বাৰ্থত আজীৱন কাম কৰি যোৱাৰ প্ৰতিশ্ৰুতি দিয়ে লুৰিণজ্যোতি গগৈয়ে । আজিৰ বিদায় অনুষ্ঠানত কেন্দ্ৰীয় কমিটীৰ কেইবাজনো বিষয়ববীয়াৰ লগতে ৰহা আঞ্চলিকৰ সদস্যসকল উপস্থিত থাকে ।
লগতে পঢ়ক:চিৰাঙত গণ সুৰক্ষা পাৰ্টীৰ বাইক ৰেলী
