কলিয়াবৰ,11 মে': প্ৰধানমন্ত্ৰী কিষাণ সন্মান নিধিৰ পৰা বঞ্চিত প্ৰকৃত কৃষক । কৃষকৰ মৰ্যদাক লৈ যেন বহুৱালি কৰিলে এচাম অৰ্থলোভী ৰাজনৈতিক নেতা-পালিনেতাই । চাকৰিয়াল, ছাত্ৰ-বৃদ্ধতো বাদেই কোনো দিনে পথাৰ নগৰকা মহিলাই লাভ কৰিছে কিষাণ সন্মান। বৰ্তমান কেৱল এয়াই সংঘটিত হৈছে প্ৰধানমন্ত্ৰী কিষাণ সন্মান নিধিৰ তালিকাত।
কলিয়াবৰ মহকুমাৰ কলিয়াবৰ উন্নয়ন খণ্ড আৰু পশ্চিম কলিয়াবৰ উন্নয়ন খণ্ডৰ অন্তৰ্গত প্ৰতিখন গাঁৱত লক্ ডাউনৰ সময়ছোৱাত এনে অনিয়মে ভূতৰ ওপৰত দানহ পৰাদি পৰিছে। কৰ্ম সংস্থাপন আৰু জীৱিকাৰ জটিল সন্ধিক্ষণত প্ৰতিজন বঞ্চিত কৃষক ক্ষুব্ধ।
চৰকাৰী কোনো সা-সুবিধা নোহোৱাকৈ গাঁঠিৰ ধন ভাঙি খেতি কৰি অতি কষ্টৰে দুটকা উপাৰ্জন কৰিবলৈ সক্ষম হৈছে খেতিয়ক কেইজনে। কিন্তু প্ৰধানমন্ত্ৰী কিষাণ সন্মান নিধিৰ বাবে আবেদন জনোৱাৰ পাচতো নৰেন নেওগৰ নাম তালিকাভুক্ত নহ'ল। তাৰ পৰিৱৰ্তে কেতিয়াও পথাৰত খোজ দি নোপোৱা গাঁৱৰে বহুকেইগৰাকী মহিলাই প্ৰধানমন্ত্ৰী কিষাণ সন্মান নিধিৰ তালিকাভুক্ত হোৱাৰ লগতে চৰকাৰী চাকৰীয়াল আৰু অৱস্থাপন্ন পৰিয়ালেও এই সুবিধা লাভ কৰিবলৈ সক্ষম হৈছে বুলি নৰেন নেওগে অৱগত কৰে ৷
লগতে পঢ়ক : বিশ্বনাথৰ পৰা উত্তৰপ্ৰদেশলৈ খোজকাঢ়ি যাত্ৰা ৭ প্ৰৱাসী শ্ৰমিকৰ
