আমচৈত বিদ্যুৎস্পৃষ্ট হৈ বন্যহস্তীৰ মৃত্যু

বুধবাৰে পুৱা আমচৈৰ কেঁকোৰা গাঁৱত বিদ্যুৎস্পৃষ্ট হৈ মৃত্যুক আঁকোৱালি লয় এটা বন্যহস্তীয়ে ৷

ৰহা, 3 জুনঃ নগাঁও জিলাৰ পশ্চিম প্ৰান্তৰ আমচৈৰ কেঁকোৰা গাঁৱত বুধবাৰে পুৱা বিদ্যুৎস্পৃষ্ট হৈ এটা বন্যহস্তীয়ে মৃত্যুক আঁকোৱালি লয় ৷ আমচৈৰ কেঁকোৰা গাঁৱৰ চাৰ্থে ৰংপী নামৰ লোক এজনৰ বাৰীত সংঘটিত হয় এই অঘটন ৷ হাতীৰ উপদ্ৰৱৰ পৰা ৰক্ষা পাবলৈ লোক গৰাকীয়ে ঘৰৰ বাৰীত সংযোগ কৰিছিল এটা বিদ্যুৎ পৰিবাহী লাইটৰ খুটা ৷

মঙলবাৰে নিশা বনাঞ্চলৰ পৰা অহা এটা প্ৰায় 10 বছৰীয়া মখনা হাতী আবাসিক এলেকাটোত প্ৰৱেশ কৰি কেইবাটাও বাসগৃহ ভাগি,পুৱতি নিশা চাৰ্থে ৰংপী নামৰ লোকজনৰ বাৰীত সোমাওতেই বিদ্যুৎস্পৃষ্ট হৈ মৃত্যু হয় ৷ ৰাইজে সন্দেহ অনুসৰি,হাতীটোৱে বিদ্যুতৰ পোহৰ দেখি শুৰেৰে বাল্বটো আজোৰি অনাৰ চেষ্টা কৰোতে বাল্বটো ভাঙি বিদ্যুৎস্পৃষ্ট হয় ৷ পৰৱৰ্তী সময়ত বন বিভাগক খবৰ দিয়াত বন বিভাগৰ লোক ঘটনাস্থলীত উপস্থিত হৈ হাতীটোৰ মৃতদেহ মৰণোত্তৰ পৰীক্ষা কৰি উক্ত স্থানতে সমাধিস্থ কৰে ৷ উল্লেখ্য যে অঞ্চলটোত দীৰ্ঘদিন ধৰি বন্যহস্তীয়ে উপদ্ৰৱ চলাই আহিছে আৰু ইয়াৰ পূৰ্বেও কেইবাটাও হাতী মৃত্যুমুখত পৰিছে ৷

লগতে পঢ়কঃ গোলাঘাটত বন্যহস্তীৰ সন্ত্ৰাস