বঢ়মপুৰ,10 মে': ধোৱা চাঙত ৰাজ্যৰ কৃষি বিভাগৰ উন্নয়ণ। চৰকাৰ হেমাহিৰ বাবে চৰণীয়া পথাৰলৈ পৰিণত নগাঁও জিলাৰ কামপুৰ কৃষিখণ্ডৰ অন্তৰ্গত কলাইখোৱা বীজ পাম আৰু কঠালগুৰী বীজ পাম ৷
আন্তঃগাঠনিৰ অভাৱত পৰি ৰৈছে কঠালগুৰীৰ 20 হেক্টৰ আৰু কলাইখোৱা 8 হেক্টৰ মাটিত থকা বীজ পাম দুখন। বীজ পাম দুখনৰ চৌহদত বেৰাৰ ব্যৱস্থা নথকাৰ লগতে, ৰখীয়াৰ অভাৱ,বাসগৃহৰ অভাৱৰ উপৰিও অন্য ধৰণৰ আন্তঃগাঠনি উন্নয়ন নোহোৱাৰ বাবে মৃত্যু মুখলৈ গতি কৰিছে উৎপাদনৰ অতিকে সম্ভৱনা থকা বীজ পাম দুখনে।
লগতে পঢ়ক : শুকুৰবাৰে অন্ত পৰিব ষষ্ঠ পৰ্য়ায়ৰ নিৰ্বাচনৰ প্ৰচাৰ
উল্লেখ্য যে পূৱ কঠালগুৰী বীজ পামত ব্যাপক পৰিমাণত কুঁহিয়াৰ উৎপাদন হোৱাৰ লগতে কলাইখোৱা বীজ পামত ধান উৎপাদন হৈছিল আৰু কৃষকে ইয়াৰ পৰা উন্নত মানৰ বীজ সংগ্ৰহ কৰিব পাৰিছিল। কিন্ত বীজ পাম দুখনৰ পয়ালগা অৱস্থাৰ বাবে সমস্যাত পৰিছে কৃষক। চৰকাৰে কৃষি বিভাগৰ ব্যাপক উন্নয়ণৰ শ্লগান দি থকাৰ সময়তে দুখনকৈ বীজ পামে মৃত্যু মুখলৈ গতি কৰাত কৃষি বিভাগৰ প্ৰকৃত ছবিখন উদঙাই তুলিছে বুলি মন্তব্য কৰিছে কৃষকে। কৃষি বিভাগটোৰ এই পয়ালগা ছবিখনৰ কথা স্বীকাৰ কৰিছে নগাঁও জিলাৰ কৃষি বিষয়া অশোক শৰ্মা খাউণ্ডে। তেওঁ বীজ পাম দুখনৰ আন্তঃগাঠনিৰ উন্নয়ণকে ধৰি বিভিন্ন দিশৰ উন্নয়ণ কৰিবৰ বাবে চৰকাৰৰ ওচৰত দাবী জনাইছে।
