নগাঁও : দিল্লী বিধানসভা নিৰ্বাচনৰ ফলাফলে আত্মবিশ্বাস বঢ়াইছে অসমৰ বিজেপি নেতাৰ । অসমৰ পৰা গৈ দিল্লীত নিৰ্বাচনী প্ৰচাৰ চলোৱা অসমৰ এগৰাকী বিজেপি বিধায়কৰ ভাষ্যত প্ৰকাশ পাইছে এই কথা । বিধায়কগৰাকী নগাঁৱৰ বঢ়মপুৰ বিধানসভা সমষ্টিৰ বিজেপি বিধায়ক জিতু গোস্বামী ।
দিল্লী বিধানসভা নিৰ্বাচনত বিজেপিৰ জয়লাভৰ পাছত নগাঁৱত বিজয় উল্লাহ পালন কৰি ২০২৬ চনৰ অসম বিধানসভা নিৰ্বাচনত ১১০ খন আসন লাভ কৰি বিজেপিয়ে জয়লাভ কৰিব বুলি সংবাদ মাধ্যমৰ সন্মুখত মন্তব্য কৰে বিধায়ক জিতু গোস্বামীয়ে ।
লগতে বিধায়ক জিতু গোস্বামীয়ে কয়, “দিল্লীবাসীক বিগত সময়ত টুপী পিন্ধোৱাৰ ফল লাভ কৰিছে আম আদমী পাৰ্টীয়ে । দিল্লীবাসীয়ে এইবাৰ কেজৰিৱালৰ আশ্বাসক গ্ৰহণ নকৰাৰ বিপৰীতে বিজেপিৰ প্ৰতিশ্ৰুতিক বিশ্বাসত লৈ ভোটদান কৰিছে ।”
দিল্লী বিধানসভা নিৰ্বাচনৰ ফলাফলৰ প্ৰভাৱ অসমতো পৰিব বুলি মন্তব্য কৰি বিধায়ক জিতু গোস্বামীয়ে কয়, “অসমত হবলগীয়া বিধানসভা নিৰ্বাচনত আমি এশ আসন লাভ কৰিম বুলি ভাবিছিলো যদিও এতিয়া আমি এশ দহখন আসনত জয়লাভ কৰিম বুলি আত্মবিশ্বাস বৃদ্ধি পাইছে ।”
শনিবাৰে নগাঁও জিলা বিজেপি কাৰ্যালয়ত পালন কৰা বিজয় উৎসৱত ঢোল বজালে বিধায়ক ৰূপক শৰ্মাই । এতিয়া সমগ্ৰ দেশ গেৰুৱাময় হৈ পৰাৰেই প্ৰমাণ দিল্লী বিধানসভা নিৰ্বাচন নে কৰিলে বুলি মন্তব্য কৰে বিধায়ক ৰূপক শৰ্মাই ।
দিল্লী বিধানসভাৰ এটা সমষ্টিৰ প্ৰচাৰ দায়িত্ব লাভ কৰি প্ৰচাৰ চলোৱা নগাঁও জিলা বিজেপিৰ প্ৰাক্তন সভাপতি অভিজিৎ নাথেও দিল্লীত কেজৰিৱালৰ ফাঁকিৰ ৰাজনীতিৰ অন্ত পৰা বুলি মন্তব্য কৰে । দিল্লীবাসীয়ে এইবাৰ বিজেপিৰ উন্নয়নৰ প্ৰতি আকৃষ্ট হৈ ভোটদান কৰা বুলি উল্লেখ কৰে বিজেপি নেতা অভিজিৎ নাথে ।
দিল্লী বিধানসভা নিৰ্বাচনত একক সংখ্যাগৰিষ্ঠতা লাভ কৰি বিজেপিয়ে জয়লাভ কৰাৰ পাছত নগাঁৱতো বিজেপিৰ নেতা কৰ্মীৰ মাজত উৎসৱমুখৰ পৰিৱেশে বিৰাজ কৰে । শনিবাৰে নগাঁও জিলা বিজেপিৰ কাৰ্যালয়ত বিজয় উল্লাহ পালন কৰে জিলাখনৰ বিজেপিৰ নেতা কৰ্মীসকলে ।
বিজয় উল্লাহত অংশগ্ৰহণ কৰি ৰূপহীহাট সমষ্টিৰ বিজেপি নেতা কমৰুজ জামান সৰকাৰে দিল্লীৰ নিৰ্বাচনী ফালফালে অসমৰ বিজেপি নেতা কৰ্মীক অধিক উৎফুল্লিত কৰাৰ লগতে উৎসাহিত কৰা বুলি মন্তব্য কৰে ।
