কাজিৰঙা, ২২জুন: "এক বৃক্ষ দশ পুত্ৰ সম" গুৰুজনাৰ এই অমৰ বাণীৰে অসমখনক প্ৰকৃতিৰ ৰম্যভূমি ৰূপে প্ৰতিষ্ঠা কৰিবলৈ আহ্বান জনালে মুখ্যমন্ত্ৰী সৰ্বানন্দ সোণোৱালে । সোমবাৰে কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চল আঞ্চলিক কাৰ্যালয়ত কাজিৰঙা ৰাষ্ট্ৰীয় উদ্যান পৰিৱেশতন্ত্ৰ ব্যৱস্থাপনা প্ৰকল্পৰ পুঁজি বিতৰণ অনুষ্ঠানত মুখ্য অতিথি হিচাবে অংশগ্ৰহণ কৰিলে অসমৰ মুখ্যমন্ত্ৰী সৰ্বানন্দ সোণোৱালে । অনুস্থানত উপস্থিত থাকি কাজিৰঙা ৰাষ্ট্ৰীয় উদ্যানৰ পৰিস্থিতিতন্ত্ৰ উন্নয়নৰ বাবে লোৱা আঁচনিৰ সফল ৰূপায়ণৰ বাবে কাজিৰঙা আৰু দাঁতিকাষৰীয়া অঞ্চলৰ ৰাইজক আহ্বান জনায় মুখ্যমন্ত্ৰী গৰাকীয়ে ।
কাজিৰঙা ৰাষ্ট্ৰীয় উদ্যান পৰিৱেশতন্ত্ৰৰ ভাৰসাম্য বৰ্তাই ৰখাত ব্যৱস্থাপনা প্ৰকল্পৰ জৰিয়তে পৰিস্থিতিতন্ত্ৰ উন্নয়ন সমিমিতিক এই পুঁজি বিতৰণ কৰি কাজিৰঙা ৰাষ্ট্ৰীয় উদ্যান পৰিৱেশতন্ত্ৰক সবল কৰাৰ পদক্ষেপত অধিক সক্ৰিয় ভূমিকাৰ বাবে আহ্বান জনাই মুখ্যমন্ত্ৰীয়ে । সভাত ভাষণ দি কাজিৰঙা ৰাষ্ট্ৰীয় উদ্যানৰ পৰিৱেশতন্ত্ৰৰ ভাৰসাম্য ৰক্ষা কৰি বিৰল-দুষ্প্ৰাপ্য জীৱকূলৰ সুৰক্ষাৰ ওপৰত গুৰুত্ব দিবলৈকো সকলো পক্ষকে আহ্বান জনায় । বিশ্ব ঐতিহাসিক ক্ষেত্ৰ কাজিৰঙাক বিশ্বৰ পৰ্যটন ক্ষেত্ৰৰূপে প্ৰতিষ্ঠা কৰাত এতিয়াওঁ ভালেমান কৰণীয় আছে বুলি ভাষণ প্ৰঙ্গগত উল্লেখ কৰিলে মুখ্যমন্ত্ৰীয়ে ।
মুখ্যমন্ত্ৰীয়ে লগতে এই আঁচনি ৰূপায়ণত বন বিভাগ, মীন বিভাগ আৰু জলসিঞ্চন বিভাগৰ দায়িত্বও সৰ্বাধিক বুলি মন্তব্য আগবঢ়াই তিনিওটা বিভাগৰে অধিক সক্ৰিয়তা কামনা কৰে । সভাত স্থানীয় বিধায়ক তথা জল সম্পদ মন্ত্ৰী কেশৱ মহন্তই গঁড় নিধন ৰোধত সহায়ক হোৱাকৈ সামূহিক উন্নয়নৰ বাবে স্থানীয় বাসিন্দাৰ সহযোগৰ জৰিয়তে কাজিৰঙাক এক গৌৰৱৰ স্থলী হিচাপে প্ৰতিষ্ঠা কৰাত গুৰুত্ব আৰোপ কৰিবলৈ আহ্বান জনায় । কাজিৰঙা ৰাষ্ট্ৰীয় উদ্যান পৰিৱেশতন্ত্ৰ উন্নয়নৰ বাবে কাজিৰঙা আৰু কাষৰীয়া জলাশয় আৰু জান-জুৰি পুনৰ উজ্জীৱিত কৰণৰ লক্ষ্যৰে জলচ্ছেদ উন্নয়ন, মীন পালন, জৈৱ-কৃষি, ফুলৰ খেতিৰ বাবে এই পূজি আৱণ্টন দিয়া হৈছে । ইতিমধ্যে কাজিৰঙা ৰাষ্ট্ৰীয় উদ্যানলৈ কেন্দ্ৰীয় চৰকাৰে প্ৰায় ২৪ কোটি ৫৬ লাখ টকা আবন্তন দিছিল। কাজিৰঙা উন্নয়নৰ বাবে আগবঢ়োৱা এই পূঁজিৰ দেশৰ ভিতৰতে প্ৰথমবাৰলৈ পৰিস্থিতিতন্ত্ৰৰ উন্নয়নৰ কাৰ্য্যৰ আনুষ্ঠানিকভাৱে শুভাৰম্ভণী কৰে মুখ্যমন্ত্ৰীয়ে ।
এই অনুস্থানটোতে গঁড় হত্যা ৰোধৰ বাবে বিশেষ পদক্ষেপ লোৱা পাঁচখন জিলাৰ জিলা প্ৰশাসন আৰু স্থানীয় ৰাইজক কৃতজ্ঞতা জ্ঞাপন কৰিলে মুখ্যমন্ত্ৰীগৰাকীয়ে । গোলাঘাট, নগাঁও, কাৰ্বি-আংলং, শোণিতপুৰ আৰু বিশ্বনাথ জিলাৰ বন বিভাগ, আৰক্ষী প্ৰশাসন আৰু স্থানীয় ৰাইজৰ সামূহীক প্ৰচেষ্টাৰে গঁড় হত্যা প্ৰতিৰোধৰ এই প্ৰক্ৰিয়া আগন্তুক দিনতো চলি থাকিব বুলি উল্লেখ কৰিলে মুখ্যমন্ত্ৰীয়ে । আৰ্থ-সামাজিক উন্নয়নৰ বাবে আত্মনিৰ্ভৰশীল, ভাৰত তথা অসমৰ বাবে কৰ'না সংক্ৰমণৰ সময়ত নীতি-নিয়ম পালন কৰিবলৈকো সকলোকে পুনৰ আহ্বান জনাই মুখ্যমন্ত্ৰীগৰাকীয়ে।
সোমবাৰে কাজিৰঙা ৰাষ্ট্ৰীয় উদ্যান পৰিস্থিতিতন্ত্ৰ ব্যৱস্থাপনা প্ৰকল্পৰ অধীনত সাতখন গাৱঁৰ পৰিস্থিতিতন্ত্ৰ উন্নয়ন সমিতিলৈ মুঠ ৬৫ লাখ টকাৰ পূঁজি বিতৰণ কৰা হয়। ইয়াৰে আমগুৰি চাং, ডিফলু পথাৰ, কুঠৰী বাঘমাৰী, গঁড়পাল, তেৱাৰীপাল, ফুলগুৰীক ১০ লাখ আৰু আমগুৰী বাগানক ৫ লাখ টকাকৈ এই পূঁজি আগবঢ়োৱা হৈছে । কাজিৰঙা ৰাষ্ট্ৰীয় উদ্যান কৰ্তৃপক্ষ আৰু নাবাৰ্ডৰ প্ৰত্যক্ষ সহযোগত বিতৰণ কৰা এই পূঁজি বিতৰণ অনুষ্ঠানত আমন্ত্ৰিত অতিথি ৰূপে অংশগ্ৰহণ কৰে জল সম্পদ মন্ত্ৰী কেশৱ মহন্ত, বিশ্বনাথৰ বিধায়ক প্ৰমোদ বৰঠাকুৰ, অসম চৰকাৰৰ সংখ্যালঘূ উন্নয়ন পৰিষদৰ অধ্যক্ষ মমিনুল আৱাল, অতিৰিক্ত প্ৰধান মুখ্য বন সংৰক্ষক এম. কে. যাদৱ, কাজিৰঙা ৰাষ্ট্ৰীয় উদ্যানৰ সঞ্চালক পি. শিৱকুমাৰ, বন সংমণ্ডল প্ৰাধিকাৰী ৰমেশ চন্দ্ৰ গগৈয়ে ।
