নগাঁও, ১৬ জানুৱাৰী: কৰ'ণাসৃষ্ট পৰিৱেশৰ মাজতে অসমবাসীয়ে উদযাপন কৰিলে ভোগৰ ভোগালী উৎসৱ । ৰাজ্যজুৰি উলহ-মালহেৰে পালন কৰা হৈছে ভোগালী বিহু । সমান্তৰালকৈ নগাঁৱতো পৰিলক্ষিত হয় ভোগালীৰ এক উৎসৱমুখৰ পৰিৱেশ । পহিলা মাঘৰ দিনা নিশা পৰ্যন্ত উদুলি মুদুলি হৈ পৰে কলঙৰ বাকৰি, নগাঁৱৰ নেহেৰুৱালী । বৃহস্পতিবাৰৰ পৰা নেহেৰুৱালীত আৰম্ভ হয় ভোগালী উৎসৱ । এই উৎসৱৰ দ্বিতীয় দিনাখনো অৰ্থাৎ শুক্ৰবাৰেও উৎসৱমুখৰ হৈ পৰে নেহেৰুৱালী ।
দ্বিতীয় দিনাৰ কাৰ্য্যসূচীত বিভিন্ন প্ৰতিযোগিতা যেনে- চাইকেল চলোৱা প্ৰতিযোগিতা, চিত্ৰাংকন প্ৰতিযোগিতা, ভূপেন্দ্ৰ সংগীত, মহিলাসকলৰ মাজত পিঠা-পনা প্ৰতিযোগিতা, দিবা-নৈশ ভলিবল প্ৰতিযোগিতা, বোৱাৰীৰ বিহু নৃত্য প্ৰতিযোগিতা, কণ-কণ লৰা ছোৱালীৰ সৌন্দৰ্য প্ৰতিযোগিতা অনুষ্ঠিত হোৱাৰ পিছত সন্ধ্যাৰ পৰা অনুষ্ঠিত হয় বৰ্ণাঢ্য সাংস্কৃতিক অনুষ্ঠান ।
