বটদ্ৰৱা, 5 মাৰ্চঃ দৌল মহোৎসৱলৈ মাজত মাথো দুদিন । ৮ মাৰ্চৰ পৰা ১২ মাৰ্চলৈ বৰ্নাঢ্য কাৰ্যসূচীৰে অনুষ্ঠিত হ'ব শ্ৰী শ্ৰী কৃষ্ণৰ দৌল যাত্ৰা মহোৎসৱ । দৌল যাত্ৰা উপলক্ষে প্ৰস্তুতি প্ৰায় সম্পূৰ্ণ কৰি তুলিছে বটদ্ৰৱা থান পৰিচালনা সমিতিয়ে । সজাই পৰাই তোলা হৈছে বটদ্ৰৱা থান । দৌল মহোৎসৱলৈ আহিবলগীয়া ভকত বৈষ্ণৱ আৰু দৰ্শনাৰ্থীক সেৱা আগবঢ়াবলৈ সাজু হৈছে বটদ্ৰৱা থান পৰিচালনা সমিতিৰ লগতে জিলা প্ৰশাসন ৷ পাচঁদিনীয়া কাৰ্যসূচীত পৰম্পৰাগত ৰীতি নীতিৰে আয়োজন কৰা হৈছে বিভিন্ন সাংস্কৃতিক অনুষ্ঠানৰো ।
আনহাতে চৰকাৰৰ পৰামৰ্শৰ প্ৰতি সহাঁৰি জনাই বটদ্ৰৱা থান পৰিচালনা সমিতিয়ে চীনা ফাকু গুৰিৰ পৰিৱৰ্তে হাৰবেল ফাকু গুৰি ব্যৱহাৰ কৰিবলৈ ভকত বৈষ্ণৱক আহ্বান জনাইছে । শ্ৰী শ্ৰী কৃষ্ণ দৌল মহোৎসৱৰ লগত সংগতি ৰাখি থান পৰিচালনা সমিতিয়ে আগন্তুক আসমীয়া নববৰ্ষৰ এখন কেলেণ্ডাৰো উন্মোচন কৰে বৃহস্পতিবাৰে । উল্লেখ্য যে, দৌল যাত্ৰা মহোৎসৱ উপলক্ষে আজিৰে পৰা ভকত বৈষ্ণৱ তথা দৰ্শনাৰ্থীৰ আগমন ঘটা পৰিলক্ষিত হৈছে ।
