চামগুৰি, ২৫ নৱেম্বৰ: বিগত কেইবাদিনো ধৰি নগাঁৱৰ চামগুৰি আৰু আন কেইবাটাও স্থানতো নিতৌ চুৰিকাণ্ড সংঘটিত হৈছে । মঙলবাৰে নিশা চামগুৰিৰ বৰালী গাঁও মজলীয়া বিদ্যালয়ত চোৰে লুট-পাত চলায় । চোৰে বিদ্যালয়খনৰ কেইবাটাও সামগ্ৰী লুটি নিয়ে। লগতে বিদ্যালয়ৰ আলমিৰাৰ লকাৰ সমূহ ভাঙি গুৰুত্বপূৰ্ণ নথি-পত্রবোৰ মজিয়াতে পেলাই থৈ যায়। সম্প্ৰতি আৰক্ষীক খবৰ দিছে বিদ্যালয় কৰ্তৃপক্ষই ।
সঘনাই সংঘটিত হৈ থকা চুৰিৰ ঘটনাক লৈ নিৰাপত্তাহীনতাত ভূগিছে চামগুৰিৰ ৰাইজ । সকলো দেখিও আৰক্ষীয়ে চকু মুদা কুলিৰ ভাও ধৰাৰ অভিযোগ উত্থাপন কৰিছে স্থানীয় লোকসকলে । কিয়নো নিতৌ চুৰিকাণ্ড সংঘটিত হৈ থকাৰ পিছতো আৰক্ষীয়ে সুৰক্ষা ব্যৱস্থা কটকটীয়া কৰাত কোনো গুৰুত্ব দিয়া নাই ।
অতি কষ্টেৰে জমা কৰা ধন, মূল্যৱান আ-অলংকাৰ চোৰে লুটি নিয়াৰ পিছত হুমুনিয়াহ কঢ়াৰ বাদে আন একো ৰাস্তা দেখা নাই চুৰিকাণ্ড সংঘটিত হোৱা ঘৰৰ গৃহস্থই । শেহতীয়াকৈ, চামগুৰিৰ শিক্ষানুষ্ঠান আৰু ধৰ্মীয় অনুষ্ঠানসমূহৰ ওপৰতো চোৰৰ কোপ দৃষ্টি পৰা পৰিলক্ষিত হৈছে ।
লগতে পঢ়ক:মৰিগাঁৱত অসম চেম্বাৰ্ছ অৱ কমাৰ্ছৰ শ্ৰদ্ধাঞ্জলি তৰুণ গগৈলৈ
