কলিয়াবৰ,28 জানুৱাৰীঃ কলিয়াবৰৰ সাংস্কৃতিক আৰু শৈল্পিক জগতখনত এক চিনাকী নাম কেশৱ পাচনী । এগৰাকী বাঁহীবাদক, চিত্ৰশিল্পী আৰু অভিনয়-কুশলী বুলি সংস্কৃতিৰ প্ৰায় প্ৰতিটো ক্ষেত্ৰতে অনবদ্য দখল আছে, তেওঁৰ দখল আছে কেৰম খেলতো ৷ বাঁহীৰ সুৰেৰে আপ্লুত কৰা কেশৱ পাচনীয়ে তুলিকা তুলি ৰূপ দিয়ে সুন্দৰ চিত্ৰৰ, কেতিয়াবা ভাওনাৰ গায়ন-বায়ন সূত্ৰৰ ৰূপত, ৰুক্মিণীহৰণৰ কৃষ্ণৰ ৰূপত দৰ্শকৰ মন জয় কৰিছে, কেতিয়াবা আকৌ দুৰ্দান্ত কেৰম খেলি মানুহৰ দৃষ্টি আকৰ্ষণ কৰিছে ৷
কিন্তু দুখৰ বিষয় যে, এই প্ৰতিভাৱান শিল্পীগৰাকী বৰ্তমান শয্যাতীত ৷ বিকল হৈ পৰিছে শিল্পীগৰাকীৰৰ দুয়োটা বৃক্ক ৷ তৎকালীনভাৱে প্ৰয়োজন বৃক্ক সংৰোপনৰ, কিন্তু টকাৰ অভাৱত এতিয়া আৰ্থিকভাৱে যুঁজিছে শিল্পীগৰাকীৰ পৰিয়ালবৰ্গই ৷ উপায়হীন হৈ কেশৱ পাচনী আৰু তেওঁৰ পৰিয়ালবৰ্গই চিকিৎসাৰ বাবে এতিয়া সুহৃদজনৰ ওচৰত আৰ্থিক সাহাৰ্য বিচাৰি কাতৰ অনুৰোধ কৰিছে ৷
এখন স্থানীয় ব্যক্তিগতখণ্ডৰ বিদ্যালয়ত কেশৱ পাচনীয়ে শিক্ষকতা কৰাৰ বাবে শেহতীয়াকৈ যোগদান কৰিছিল যদিও বৃক্কৰ এই জটিল ৰোগৰ ফলত উপস্থিত থাকিব পৰা নাই বিদ্যালয়ত। বিদ্যালয়ৰ শিক্ষক-কৰ্মচাৰী, ছাত্ৰ-ছাত্ৰী তথা বিদ্যালয় কৰ্তৃপক্ষই সহায়ৰ হাত আগবঢ়োৱাৰ ওপৰিও কলিয়াবৰৰ ব্যক্তিগত অনুষ্ঠান-প্ৰতিষ্ঠানে সহায় কৰিবলৈ আগবাঢ়ি আহিছে । এইক্ষেত্ৰত আগবাঢ়ি আহিছে কলিয়াবৰৰ শিল্পীসমাজ, অনুষ্ঠান প্ৰতিষ্ঠান, কেশৱ পাচনীৰ গুণমুগ্ধ । সকলোৱে আকুণ্ঠ চিত্তে যিয়েই যেনেকৈ পাৰিছে সহায়ৰ হাত আগবঢ়াইছে । তথাপিও পৰ্যাপ্ত নহয় এই সাহাৰ্য । পৰিয়ালৰ তৰফৰ পৰা অসমৰ মুখ্যমন্ত্ৰী আৰু স্বাস্থ্য মন্ত্ৰীৰো সহায় আশা কৰিছে । সেয়ে সকলোৱে আশা কৰিছে কলিয়াবৰৰ প্ৰতিটো শৈল্পীক কাৰ্য্যক্ৰমত একান্ত সহযোগী হৈ থিয় দিয়া কেশৱ পাচনীৰ সৈতে এই বিপদৰ সময়ত সকলো থিয় দিয়ক । কেশৱ পাচনীৰ চিকিৎসাৰ বাবে ইচ্ছুক সহানুভূতিশীল ব্যক্তিয়ে ভাৰতীয় ষ্টেট বেঙ্কৰ কলিয়াবৰ শাখাৰ কেশৱ পাচনীৰ একাউণ্ট নং ১১৬৫৬৮০৮৮৯৫ (11656808895), IFSC SBIN0004273 ত আৰ্থিক সহায় আগবঢ়াবলৈ আহ্বান পৰিয়ালবৰ্গৰ ৷
