নগাঁও,19 ডিচেম্বৰ : সংশোধিত নাগৰিকত্ব আইনৰ বিৰুদ্ধে প্ৰতিবাদ অব্যাহত থকাৰ সময়ত আঞ্চলিক দল অসম গণ পৰিষদত আৰম্ভ হৈছে নেতৃত্বক লৈ খোৱা কামোৰা ৷ বহু বিতৰ্কিত আইনখন বাতিলৰ লগতে অগপ নেতৃত্বৰ পৰিৱৰ্তনৰ দাবীত নগাঁৱত দলটোৰ নেতা-কৰ্মীৰ প্ৰতিবাদ ৷ নগাঁও জিলা অগপৰ মতে প্ৰফুল্ল মহন্তই নেতৃত্ব দিয়ক আঞ্চলিক দলটোক ৷ দুটা শিবিৰত যেন বিভক্ত হৈছে আঞ্চলিক দল অসম গণ পৰিষদ ৷ এফালে যদি প্ৰফুল্ল কুমাৰ মহন্ত আনফালে অতুল বৰা,কেশৱ মহন্ত ৷
জাতিধ্বংসী নাগৰিকত্ব সংশোধনী আইনক সমৰ্থন কৰা অগপৰ বৰ্তমানৰ নেতৃত্বৰ বিৰুদ্ধে জাঙুৰ খাই উঠিছে নগাঁও জিলা অগপ ৷ বৃহস্পতিবাৰে অগপ দলৰ নেতৃত্বৰ পদত্যাগৰ লগতে নাগৰিকত্ব সংশোধনী আইনৰ বিৰুদ্ধে নগাঁও জিলা অগপই সাব্যস্ত কৰে প্ৰতিবাদ ৷ সহস্ৰাধিক কৰ্মীক লগত লৈ দলটোৰ জিলা কাৰ্যালয়ৰ পৰা উলিওৱা হয় প্ৰতিবাদী সমদল ৷ সমদলৰ নেতৃত্ব দিয়ে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই ৷ নগাঁও চহৰৰ মাজেৰে উলিওৱা সমদলৰ অন্তত জিলা কাৰ্যালয়ৰ সন্মুখতে অনুষ্ঠিত হয় প্ৰতিবাদী সভা ৷ এই সভাতেই জিলা নেতৃবৰ্গই বিজেপিক উৎখাত কৰাৰ বাবে অগপৰ নেতৃত্বৰ পৰিৱৰ্তনৰ দাবী তোলে । ইয়াৰ লগতে দলীয় সদস্যসকলে অগপত পুনৰ প্ৰফুল্ল কুমাৰ মহন্তৰ নেতৃত্ব বিচাৰে ৷
কেন্দ্ৰীয় চৰকাৰে নাগৰিকত্ব সংশোধনী বিধেয়কক আইনত পৰিণত কৰি অবৈধ বিদেশীক ৰঙা দলিছা পাৰি দিয়া বুলি উল্লেখ কৰে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই ৷ তেখেতে কয় যে,এই আইনৰ অধীনত বাংলাদেশৰ পৰা আহিবলগীয়া অধিকাংশই অসমক বাছি ল'ব আৰু খিলঞ্জীয়াক সংখ্যালঘুত পৰিণত কৰি ৰাজনৈতিক অধিকাৰতো প্ৰত্যাহ্বানৰ সৃষ্টি কৰিব৷ বৰ্তমানৰ অগপ নেতৃত্বক বিশ্বাসঘাতক আখ্যা দি প্ৰফুল্ল কুমাৰ মহন্তই কয় যে,অসমীয়া জাতিৰ কফিনত শেষৰটো গজাল মাৰিলে একমাত্ৰ অগপ সাংসদ বীৰেন্দ্ৰ প্ৰসাদ বৈশ্যই ৷
আনহাতে, অসম গণ পৰিষদ দল যদি জাহ যায় তেন্তে তাৰ বাবে অতুল বৰা,কেশৱ মহন্ত,ফণীভূষণ চৌধুৰীৰ লগতে ছয় সাতজনেই জগৰীয়া বুলি মন্তব্য কৰে অগপৰ প্ৰাক্তন মন্ত্ৰী গিৰীন্দ্ৰ কুমাৰ বৰুৱাই ৷ ইয়াৰ লগতে অগপ দলৰ নাকি সদায় ৰাইজৰ লগতে থাকিব বুলিও মন্তব্য কৰে প্ৰাক্তন মন্ত্ৰীগৰাকীয়ে ৷
লগতে পঢ়ক : ৰাজ্যৰ শেহতীয়া পৰিস্থিতিত শংকিত বিজেপি বিধায়ক, মুখ্যমন্ত্ৰীক সাক্ষাৎ
