বঙাইগাঁও,21 জানুৱাৰী : সেউজীয়া মনোমোহা পৰিৱেশে পৰিপুষ্ট চহৰ বঙাইগাঁও ৷ পৰ্যটনৰ প্ৰচুৰ সম্ভাৱনাপুষ্ট বঙাইগাঁৱত আছে কেবাটাও উল্লেখযোগ্য পৰ্যটনক্ষেত্ৰ ৷ এটুকুৰা বিশেষ শিলে বৰ্তমান স্থান লাভ কৰিবলৈ সক্ষম হৈছে বঙাইগাঁৱৰ পৰ্যটন ক্ষেত্ৰ হিচাপে ৷ প্ৰায় চাৰিবছৰ পূৰ্বে এগৰাকী চাইক্লিষ্টে আৱিষ্কাৰ কৰা শিলচটা আছে বঙাইগাঁৱৰ সমীপৰ ইতিহাসপ্ৰসিদ্ধ নাককাটি পাহাৰত ৷
প্ৰবাদমতে হেজাৰ বছৰৰ পূৰ্বে বঙাইগাঁও জিলাৰ বইটামাৰীৰ নিকটৱৰ্তী দেৱানগাঁৱত ৰাজত্ব কৰিছিল ভূমেশ্বৰ নামৰ এজন ৰজাই ৷ ভূমেশ্বৰ ৰজাৰ পত্নীৰ নাম আছিল সোণাময়ী ৷ ৰজাৰ অনুপস্থিতিত ৰাণী ভৃত্যৰ সৈতে অবৈধ প্ৰেমত মত্ত হৈ আছিল ৷ এই কথাৰ ভূ পাই এদিন ৰজাই হাতে-লোটে ৰাণীক ধৰা পেলায় ৷ ৰাণীৰ এই কাণ্ডত ৰজাই খঙ দমাব নোৱাৰি ততালিকে ৰাণীৰ নাকটো কাটি পেলায় ৷ তেতিয়াৰে পৰা সোণাময়ীৰ নাম সলনি হৈ নাককাটি হয় ৷ সেইসূত্ৰে পাহাৰখনৰ নাম হয় নাককাটি পাহাৰ ৷
2016 চনৰ কথা ৷ বঙাইগাঁও জিলাৰ যুৱক নৱজ্যোতি ৰায়ে পোনপ্ৰথমবাৰৰ বাবে এই নাককাটি পাহাৰৰ অৱস্থিতিৰ উমান লাভ কৰে ৷ পেচাত এজন চাইক্লিষ্ট নৱজ্যোতিয়ে এই কথা সামাজিক কাৰ্যত জড়িত স্থানীয় যুৱক অনুজ চৌধুৰীক অৱগত কৰে ৷ যুৱকদ্বয়ে ঠাই টুকুৰাৰ ছবি গুগলত মিলাই চোৱাত হুবহু সাদৃশ্য লাভ কৰে বিশ্ববিখ্যাত আমেৰিকাৰ ভাৰ্জিনীয়া চিটিৰ মেক্ফি নব আৰু নৰৱেৰ টুলটুঙ্গা পাহাৰৰ শৃংগৰ সৈতে ৷ ইয়াৰ পিছত ৰায়ে প্ৰথমবাৰৰ বাবে নাককাটি পাহাৰৰ ফটো ছ’চিয়েল মেডিয়াযোগে প্ৰচাৰ কৰে ৷ ছ’চিয়েল মেডিয়াত এই ফটো ভাইৰেল হোৱাৰ পিছতে শিলটুকুৰাই লাভ কৰে অন্য এক পৰিচয় ৷ তেতিয়াৰে পৰা ঠাই টুকুৰালৈ সোঁত বয় দেশী-বিদেশী পৰ্যটকৰ ৷ সকলোৰে হেঁপাহ শিলচটাত বহি এবাৰ ফটো উঠাৰ,এখন ছেলফি তোলাৰ লগতে বঙাইগাঁৱৰ নৈসৰ্গিক দৃশ্য উপভোগ কৰাত ৷
লগতে পঢ়ক : 24 তাৰিখলৈ বাতিল উত্তৰ-পূৱৰ বহুকেইখন ৰেল
প্ৰায় চাৰিবছৰ অতিক্ৰম কৰা নাককাটি পাহাৰখনৰ সমীপৰ ঠাই টুকুৰা পৰ্যটন ক্ষেত্ৰৰূপে গঢ় দিয়াৰ বাবে যত্নপৰ হৈছে দেৱানগাঁৱৰ নাককাটী সংঘ ৷ কেইজনমান উদীয়মান যুৱকৰ প্ৰচেষ্টাত গঢ় লোৱা সংঘটোৱে নাককাটি পাহাৰক বিশ্বত পৰিচয় কৰাই দিবলৈ যত্নপৰ হোৱা পৰিলক্ষিত হৈছে ৷ পাহাৰটোৰ একেবাৰে ওখ শৃঙ্গটোৰ ওপৰত এচটা শিল আছে য’ৰ পৰা পৰ্যটকসকলে বঙাইগাঁও জিলাৰ বিভিন্ন প্ৰান্তৰ দৃশ্য উপভোগ কৰিব পাৰে ৷ প্ৰাকৃতিকভাৱে বাঢ়ি অহা এই শিলচটা পৰ্যটকৰ আকৰ্ষণৰ কেন্দ্ৰবিন্দু ৷ নাককাটী পাহাৰৰ তলেৰে বৈছে টুনীয়া নৈ ৷
প্ৰচুৰ পৰ্যটনৰ সম্ভাৱনা থকা নাককাটি পাহাৰে ভৌগোলিক মানচিত্ৰত সুকীয়া স্থান অধিকাৰ কৰি আছে যদিও আজিকোপতি দৃষ্টি আকৰ্ষণ কৰিব পৰা নাই পৰ্যটন বিভাগৰ ৷ চৰকাৰৰ পৰ্যটন আৰু পুৰাতত্ত্ব বিভাগে গুৰুত্ব প্ৰদান কৰিলে নিশ্চয় বহু গুৰুত্বপুৰ্ণ ঐতিহাসিক তথ্য উদ্ধাৰ হ’ব নাককাটিৰ পৰা ৷ অসম চৰকাৰৰ লগতে বি টি চি প্ৰশাসনে এইক্ষেত্ৰত গুৰুত্ব আৰোপ কৰা উচিত ৷ নাককাটী ভ্ৰমণ কৰি অহা প্ৰতিজন লোকে সম্প্ৰতি এয়া কামনা কৰে ৷ অঞ্চলটোৱে পৰ্য্যটনৰ ক্ষেত্ৰত বহু গুৰুত্বপুৰ্ণ ভূমিকা গ্ৰহণ কৰিবলৈ সক্ষম হ’ব বুলি দাবী কৰে স্থানীয় লোকসকলে ।
বঙাইগাঁও চহৰৰ পৰা নাককাটি পাহাৰলৈ দুৰত্ব প্ৰায় 19.5 কিল’মিটাৰ ৷ যাতায়াতৰ তীব্ৰ অসুবিধা থকা নাককাটীলৈ অহা-যোৱাৰ ক্ষেত্ৰত পৰ্যটকে পাৰ হ’বলগীয়া হয় টুনীয়া নৈ ৷ স্থানীয় লোকে নিৰ্মাণ কৰি দিয়া একমাত্ৰ বাঁহৰ সাঁকোকে সাৰথি কৰি নাককাটি অভিমুখে যাত্ৰা কৰে প্ৰতিজন পৰ্যটকে ৷ ফলত তীব্ৰ অসুবিধাৰ সন্মুখীন হয় বিদেশী পৰ্য্যটকসকল ৷ যাতায়াতৰ বাবে প্ৰয়োজনীয় ব্যৱস্থা গ্ৰহণ কৰিলে অঞ্চলটোত পৰ্যটকৰ সংখ্যা বৃদ্ধি পোৱাৰ সম্ভাৱনা আছে ৷ এতিয়া মাথোঁ প্ৰয়োজন চৰকাৰৰ বিভাগীয় মুৰব্বীৰ গুৰুত্ব ৷
সম্প্ৰতি প্ৰাকৃতিকভাৱে বিভিন্ন কাৰণত ফাঁট মেলিছে পাহাৰখনৰ শৃংগত থকা শিলচটাত ৷ দিনক দিনে বৃদ্ধি পোৱা পৰ্যটকৰ সংখ্যাৰ প্ৰতি লক্ষ্য ৰাখি ই এক অশুভ লক্ষণ বুলি ক’ব পাৰি ৷ কাৰণ যিকোনো মুহুৰ্ততে ঠাই টুকুৰাত সংঘটিত হ’ব পাৰে দুৰ্ঘটনা ৷ কোনো বিষম পৰিস্থিতি সৃষ্টি হোৱাৰ পূৰ্বে চৰকাৰে বিশেষকৈ পৰ্যটন বিভাগে এইক্ষেত্ৰত অৰিহণা আগবঢ়ালে সাম্ভাব্য বিপদৰ পৰা হাত সাৰিব পৰা যাব ৷
লগতে পঢ়ক : তিনিস্তৰীয় সুৰক্ষা ব্যৱস্থাৰে গণতন্ত্ৰ দিৱসৰ আয়োজন খানপাৰাত
