নগাঁও, 4 অক্টো়বৰ : সুদীৰ্ঘ 33 বছৰৰ অন্তত পুনৰ নগাঁৱৰ পৰা প্ৰকাশ পালে শিশু আলোচনী 'অকণিৰ বাৰ্তা' ৷ অকণিৰ মেলৰ দ্বাৰা প্ৰকাশিত এই 'অকণিৰ বাৰ্তা'ৰ ব্যৱস্থাপনাত আছে প্ৰদীপ কাহাৰ, ডঃ মুনমুন বৰা আৰু বিভূতি শৰ্মা ।
উল্লেখযোগ্য যে, বিশিষ্ট লোক সংস্কৃতিৰ গৱেষক, নিৱন্ধকাৰ হেমন্ত কুমাৰ শইকীয়াৰ তত্বাৱধানত গঠন হোৱা 'অকণিৰ মেল' নামৰ অনুষ্ঠানটোৱে শিশুসকলৰ উত্তৰণৰ বাবে বিভিন্ন পদক্ষেপ গ্ৰহণ কৰি আহিছে । বিগত বৰ্ষত এই অনুষ্ঠানটোৰ তৎপৰতাত শিশু সমাৰোহ অনুষ্ঠিত হৈছিল । 'অকণিৰ মেল'ৰ দ্বাৰা প্ৰকাশিত 'অকণিৰ বাৰ্তা' দেওবাৰে মিলনপুৰ সাংস্কৃতিক চ'ৰাত শুভ উদ্বোধন কৰা হয় ।
লগতে পঢ়ক : হিন্দুত্ববাদী নেতা সত্যৰঞ্জন বৰাৰ বিৰুদ্ধে বাক্সাত ৰাইজৰ প্ৰতিবাদ
উক্ত উদ্বোধনী সভাত অংশগ্ৰহণ কৰে নগাঁও জিলা সাহিত্য সভাৰ সভাপতি পৰাণ কুমাৰ বৰুৱাই । অনুষ্ঠানত অংশগ্ৰহণ কৰি 'দৈনিক অসম'ৰ সাংবাদিক চন্দনজ্যোতি বৰাই কয় যে, সম্প্ৰতি ডিজিটেল ব্যৱস্থাৰ বাবে ম'বাইল, ফেচবুক আদিত অধিক সময় শিশু তথা যুৱক-যুৱতী সকল ব্যস্ত থকা বুলি অভিযোগ উঠাৰ সময়তে নগাঁও জিলাৰ মিলনপুৰৰ পৰা প্ৰকাশিত 'অকণিৰ বাৰ্তা'ই এখন মঞ্চ দিছে যত শিশু সকলৰ মাজত গ্ৰন্থ অধ্যয়ন, গল্প-প্ৰৱন্ধ, কবিতা আদি লিখাৰ প্ৰতি উৎসাহ যোগাইছে । সেয়ে 'অকণিৰ মেল' অনুষ্ঠানৰ উদ্যোক্তা সকল ধন্যবাদৰ পাত্ৰ বুলি মন্তব্য প্ৰদান কৰে ।
লগতে পঢ়ক : প্ৰসংগ-হাথৰস কাণ্ডঃ 6 অক্টোবৰত ৰাজ্যজুৰি বিক্ষোভ প্ৰদৰ্শন বামপন্থী তথা কংগ্ৰেছৰ
আনহাতে, অনুষ্ঠানত অংশগ্ৰহণ কৰি শিশু বন্ধু দুলাল বৰা, ভাগ্যলক্ষ্মী মহন্তইও ভাষণ প্ৰদান কৰি শিশু সকলক উৎসাহিত কৰে । অকণিৰ মেলৰ আহ্বায়ক হেমন্ত কুমাৰ শইকীয়াই অনুষ্ঠানৰ উদ্দেশ্য ব্যাখ্যা আগবঢ়াই । উন্মোচনী অনুষ্ঠানত নৱনীত নিয়ৰ শইকীয়া, মৃগাংক শ্যাণ্ডিল্য, আৰাধ্যা বৰা, দেৱনন্দনা কাহাৰ, শ্বায়াংক শ্যান্দিল্য, উদয়ন বৰগোঁহাই আদি শিশুসকলে কবিতা আবৃত্তি কৰাৰ লগতে সাধু কয় । 'অকণিৰ মেল'ৰ অন্যতম আহ্বায়ক অচিন্ত্য শৰ্মা, ভুপেন বৰা, বিকাশ পাঠক, ৰিতেন কুমাৰ বৰা, বিপিন বৰগোহাঁই, জ্যোতিপ্ৰসাদ শৰ্মা, ৰাজীৱ কুমাৰ নাথ, ফটো সাংবাদিক নৃপেন শইকীয়া আদিকে বহুতো লোক অনুষ্ঠানটোত উপস্থিত থাকে । অনুষ্ঠানত আদৰণি ভাষণ প্ৰদান কৰে নৱ বৰদলৈয়ে । প্ৰকাশ কৰি উলিওবা আলোচনীখন চাৰিমাহৰ মূৰে মূৰে অৰ্থাৎ বছৰটোত তিনিটা সংখ্যা প্ৰকাশ কৰাৰ প্ৰাথমিক সিদ্ধান্ত কৰা হৈছে । আলোচনীখনৰ এটা PDF সংস্কৰণো উন্মোচিত কৰে উক্ত সভাতে ।
উল্লেখ্য যে, 1987 চনৰ 1989 চনৰ এই সময়ছোৱাৰ ভিতৰত নগাঁও জিলাৰ মিলনপুৰৰ পৰা ভাগ্যলক্ষ্মী মহন্তৰ সম্পাদনাত প্ৰকাশ পাইছিল 'মইনা' নামৰ এখন শিশু আলোচনী । আলোচনীখন প্ৰকাশ পোৱাৰ 33 বছৰৰ পিচত মিলনপুৰৰ পৰাই প্ৰকাশ পাইছে দ্বিতীয়খন শিশু আলোচনী 'অকণিৰ বাৰ্তা'।
লগতে পঢ়ক : আজিৰ খেলঃ মুম্বাই ইণ্ডিয়ানছৰ সন্মুখত ছানৰাইজাৰ্ছ হায়দৰাবাদ
