কলিয়াবৰ,18 জুন: ১৮০ টা আত্মসহায়ক গোটৰ মহিলাৰ পৰা কোটি টকা সংগ্ৰহেৰে ৰামঠগন দি আৰক্ষীৰ জালত দুই প্ৰৱঞ্চক ৷ কলিয়াবৰৰ আৰক্ষীয়ে অভিযান চলাই মঙলবাৰে আটক কৰে কাজিৰঙাৰ ১নং শিলডুবিৰ ফৰিদুল ইছলাম আৰু হাতীগাঁও গাঁও পঞ্চায়তৰ কাউঞ্চিলৰ মেৰিলিন ধানোৱাৰ নামৰ দুই প্ৰৱঞ্চকক ৷ প্ৰৱঞ্চক দুগৰাকীৰ লগতে গোলাঘাটৰ সৰুপথাৰৰ হীৰামণি গোঁহাই নামৰ এগৰাকী যুৱতীকো সোধ-পোচৰ বাবে আটক কৰে আৰক্ষীয়ে ৷ হীৰামণি গোঁহাইয়ে আত্মসহায়ক গোটসমূহক প্ৰশিক্ষণ দিয়াৰ কামত নিয়োজিত আছিল ৷ দুয়ো প্ৰৱঞ্চককে মিছা আৰক্ষী চকীত জেৰা অব্যাহত ৰাখিছে আৰক্ষীয়ে ।
প্ৰৱঞ্চকক আটক কৰাৰ খবৰ লাভ কৰাৰ মাত্ৰকে প্ৰাপ্য ধন বিচাৰি থানা চৌহদত ভিৰ কৰিছেহি কলিয়াবৰৰ আঞ্জুকপানী,ৰেকাপাহাৰ, সোনাজুৰি,বালিজুৰি আদি অঞ্চলৰ মহিলাই। উল্লেখ্য যে, প্ৰায় ডেৰ শতাধিক মহিলা আত্মসহায়ক গোটক হস্ত শিল্পৰ প্ৰশিক্ষণৰ লগতে ঋণ দিয়াৰ নামত বিভিন্ন স্থানৰ পৰা প্ৰায় ১কোটি টকা সংগ্ৰহ কৰিছিল প্ৰৱঞ্চক ফৰিদুল ইছলাম আৰু বিজেপিৰ আঞ্চলিক পঞ্চায়তৰ মেৰিলিন ধানোৱাৰে। ইয়াৰ বিনিময়ত গোট সমূহৰ দ্বাৰা উৎপাদিত সামগ্ৰী ক্ৰয় কৰাৰ আশ্বাস দিয়াৰ লগতে ঋণ দিয়াৰো প্ৰলোভন দিছিল প্ৰৱঞ্চকৰ চক্ৰটোৱে। কিন্তু ধন সংগ্ৰহৰ পাচতে মহিলাসকলৰ লগত যোগাযোগ বিচ্ছিন্ন কৰে প্ৰৱঞ্চক ফৰিদুল ইছলামে আৰু প্ৰৱঞ্চক ফৰিদুলক সহযোগ কৰি আহিছিল কলিয়াবৰৰ হাতীগাঁও পঞ্চায়তৰ কাউঞ্চিলৰ তথা বিজেপি কৰ্মী মেৰিলিন ধানোৱাৰে।
