কলিয়াবৰ, 1 জুনঃ নগাঁৱৰ জখলাবন্ধাত আটক আন্তঃৰাজ্যিক ১০ জনীয়া ইৰাণী গেং৷ মহানগৰ আৰক্ষী আৰু কলিয়াবৰ আৰু জখলাবন্ধা আৰক্ষীৰ অভিযানত শুকুৰবাৰে নিশা জখলাবন্ধাৰ পৰা আটক কৰে দলটোৰ সদস্যকেইজনক । উল্লেখ্য যে ৰাজ্যৰ আন প্ৰান্তৰ লগতে জখলাবন্ধাটো দীৰ্ঘদিন ধৰি চলি আহিছিল ইৰাণী গ্ৰুপৰ সন্ত্ৰাস ৷ জখলাবন্ধাৰ বিভিন্ন স্থানত বিহাৰ আৰু পশ্চিমবংগৰ পৰা আহি থিতাপি লোৱা নগাঁও-শোণিতপুৰৰ বিভিন্ন অঞ্চলত 'বান্দৰ-কেঁকোৱা' ব্যৱহাৰৰে অব্যাহত ৰাখিছিল ডকাইতি ৷ আটকাধীন দলটোৰ পৰা এখন পালছাৰ বাইকৰ লগতে উদ্ধাৰ কৰা হয় বহু আপত্তিজনক সামগ্ৰী । গ্ৰুপটোৰ সদস্যকেইটা বিহাৰৰ ফিৰোজ যাদৱ, বিনয় যাদৱ, শিৱা যাদৱ ,দিপেশ সিং, অভয় যাদৱ, আকাশ যাদৱ , দিপেশ দাস আৰু পশ্চিমবংগৰ আনিশ গোৱালা, ৰিতেশ গোৱালা, আটিফ গোৱালা বুলি চিনাক্ত কৰা হৈছে । শুকুৰবাৰে নিশা মহানগৰীৰ পানবজাৰ আৰক্ষীৰ এক গোপন খবৰৰ ভিত্তিতে পানবজাৰ আৰক্ষী আৰু জখলাবন্ধা আৰক্ষীয়ে চলোৱা যৌথ অভিযানত জখলাবন্ধাৰ ভিন্ন স্থানৰ পৰা আটক কৰে দুৰ্ধৰ্ষ ইৰাণী দলৰ সদস্যকেইটাক ৷
আনহাতে, শনিবাৰে পুৱা গেংটোৰ আন দুজন সদস্যক আটক কৰে আৰক্ষীয়ে ৷ AS-01-DY-5782 নম্বৰৰ চুৰি কৰা পালছাৰ বাইকেৰে পলায়নৰ চেষ্টা চলাওঁতেই বিহাৰৰ আকাশ যাদৱ আৰ দীপেশ দাস নামৰ দুই চোৰক গ্ৰেপ্তাৰ কৰে আৰক্ষীয়ে ৷ 12 বছৰীয়া কিশোৰকে ধৰি মুঠ 10 জনীয়া ইৰাণী গ্ৰুপটোৰ বিৰুদ্ধে ইতিমধ্যে ৰাজ্যৰ কেইবাখনো আৰক্ষী চকীত ৰুজু হৈছে গোচৰ ৷ গাড়ী, মটৰচাইকেল চুৰি কৰাৰ লগতে বান্দৰ কেঁকোৱা ছটিয়াই বহু লোকৰ ধন লুট কৰি সন্ত্ৰাস চলাইছিল এই গেংটোৱে । দলটোৰ লগত জড়িত আন আন সদস্যৰ বিৰুদ্ধে অভিযান অব্যাহত ৰাখিছে আৰক্ষীয়ে ।
