মৰিগাঁও, 18 নৱেম্বৰ : ৰাজ্যজুৰি উদযাপন হৈছে ৰাস মহোৎসৱ(Raas Mahotsav) ৷ লোকে-লোকাৰণ্য হৈ পৰিছে ৰাসথলীসমূহ ৷ ৰাজ্যৰ বিভিন্ন প্ৰান্তৰৰ সমান্তৰালকৈ বুধবাৰৰ নিশাৰ পৰা মৰিগাঁৱৰ বিভিন্ন ৰাস মন্দিৰত ক’ভিড প্ৰট’কল(Covid Protocol) মানি উদযাপন কৰা হৈছে শ্ৰী শ্ৰীকৃষ্ণৰ ৰাসলীলা ।
মৰিগাঁৱৰ সত্ৰসমূহৰ লেখীয়াকৈ বিভিন্ন সাংস্কৃতিক পীঠ আৰু ৰাস মন্দিৰত অনুষ্ঠিত হৈছে শ্ৰী শ্ৰীকৃষ্ণৰ ৰাস মহোৎসৱ বিভিন্ন সাংস্কৃতিক অনুষ্ঠান ৷ পশ্চিম লঠাবড়ী ৰাস মন্দিৰত তিনিদিনীয়াকৈ অনুষ্ঠিত হৈছে 31 সংখ্যক শ্ৰীকৃষ্ণ ৰাসলীলাৰ বৰ্ণাঢ্য কাৰ্যসূচী ৷ প্ৰথম নিশাৰ ৰাসলীলাত অংশ লোৱা শতাধিক গোপিনীক এইবেলি দেখা গ’ল আন এক ব্যতিক্ৰমী ৰূপত ৷
দহ বছৰৰ উৰ্ধৰ প্ৰতিগৰাকী গোপিনীয়ে মুখত মাস্ক পৰিধান কৰি অংশ লয় ৰাসনৃত্যত ৷ ইয়াৰ সমান্তৰালকৈ হাতে হাতে গোহাৰি লৈ ক’ভিড ভেকচিন(Covid Vaccine) লোৱাৰ আহ্বান জনায় গোপিনীসকলে ৷ এক কথাত ক’বলৈ গ’লে বুধবাৰৰ সন্ধিয়াৰ ভাগৰ পৰা ৰাজ্যৰ আকাশ-বতাহ মুখৰিত হৈ পৰিছে দৈৱকী-নন্দন, গোপ কুমাৰ গোবিন্দ নমঃৰে । গকুল বৃন্দাবনত পৰিণত হৈছে ৰাসথলীসমূহ ।
লগতে পঢ়ক : Majuli Raas mahotsav : এইবাৰ দৈৱকীৰ ৰূপত দীপলিনা ডেকা
