মৰিগাওঁ,3 জানুৱাৰীঃ মৰিগাওঁৰ লাহৰীঘাটত শুকুৰবাৰে সংঘটিত হয় শোকাবহ পথ দুৰ্ঘটনা ৷ বালি কঢ়িওৱা ট্ৰাক আৰু বাইকৰ মুখামুখি সংঘৰ্ষৰ ফলত থিতাতে নিহত হয় শিশু ৷ লাহৰীঘাট আৰক্ষী থানাৰ অন্তৰ্গত ফলিহামাৰী পামত বিয়লি প্ৰায় চাৰি বজাত এখন বালি কঢ়িওৱা ট্ৰাকে এখন বাইকত খুন্দা মাৰে ৷ মুহুৰ্ততে বাইকত অহা একেটা পৰিয়ালৰে চাৰিজন সদস্য দুৰ্ঘটনাত পতিত হয় ৷ পৰিয়ালটোৰ তিনি বছৰীয়া শিশুটিৰ ওপৰেৰে ট্ৰাকখন পাৰ হৈ যোৱাত থিতাতে নিহত হয় ফাহিম আকটাৰ নামৰ শিশুটি । লগতে গুৰুতৰভাৱে আহত হয় পিতৃ- মাতৃ আৰু আনটো শিশু ৷
উল্লেখ্য যে,পৰিয়ালক লৈ বাইক আৰোহীজনে ঘৰ অভিমুখে গৈ থকা অৱস্থাত দুৰ্ঘটনাটো সংঘটিত হয় । দুৰ্ঘটনাটো সংঘটিত কৰা ট্ৰাকখনৰ নম্বৰ হৈছে AS 01B-7312 ৷ গুৰুতৰভাৱে আহত দম্পতী বৰ্তমান চিকিৎসাধীন অৱস্থাত আছে । ইতিমধ্যে ঘটনাস্থলীত আৰক্ষী উপস্থিত হৈ বাহন দুখন জব্দ কৰাৰ লগতে মৃত শিশুটিক মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে ৷ সমগ্ৰ ঘটনাটোৱে অঞ্চলটোত শোকৰ ছাঁ পেলাইছে ৷
লগতে চাওকঃগুৱাহাটীৰ ১৭০ খন হোটেলৰ বুকিং শেষঃ খেল' ইণ্ডিয়াৰ বুজ ল'লে মুখ্যমন্ত্ৰীয়ে
